اسلام آباد۔ 02 اکتوبر (اے پی پی) وزیر خارجہ مخدوم شاہ محمود قریشی جمعہ نادے آ کویت سفارتخانہ نا دورہ ءِ کرے۔ ایمبیسی آ بننگ آ پاکستان اٹ کویت نا سفیر نصرالمطہری وزیر خارجہ ءِ بخیر کرے۔ وزیر خارجہ کویت نا مسکوہی امیر شیخ صباح الاحمد الجابر الصباح نا کزیت آ ہڑزخواہی کرے وپارے کہ پاکستان و کویت نا نیام اٹ دیرینہ ، برادرانہ تعلقداری ءِ۔ وزیر خارجہ ایماندار مسکوہی امیر کویت نا روح انا ثواب کن دعا پاتیا کرے و اونا بخشش و درجہ غاتا بڑزی کن دعا کرے۔ وزیر خارجہ پارے کہ مسکوہی امیر کویت نا کزیت شاہی خاہوت، کویتی حکومت و الس تون ہڑزخواہی کیک۔ مخدوم شاہ محمود قریشی پارے کہ اونا دور حکمرانی ٹی پاکستان و کویت نا نیام اٹ ہڑتوم آ کنڈآتا تعلقداری ءِ وسعت ملا، مخدوم شاہ محمود قریشی پارے کہ امیر کویت شیخ صباح الاحمد الجابر الصباح اسہ امن پسند و مشفق حکمران اسے نا وڑاٹ چاہنگاکہ۔ وزیر خارجہ ہڑزخواہی کتاب اٹ تینا تاثر آتے نوشتہ کرے۔ کویتی سفیر نصرالمطہری کویتی سفارتخانہ غا بننگ و ایماندار امیر کویت کن ہڑزخواہی آ وزیر خارجہ نا منت واری ءِ ہرفے۔
