اسلام آباد۔ 02 اکتوبر (اے پی پی) وزیراعظم نا خصوصی کمکار جان جوڑی ڈاکٹر فیصل سلطان پارینے کہ 21 آن 25 ستمبر قومی انسداد پولیو مہم اٹی کم و ود 39 ملین چناتے انسداد پولیو پُڑی کنفنگانے۔ کورونا دین انا سوب آن فروری 2020ء آن پد اولیکو قومی انسداد پولیو مہم مسنے، ہندا مہم اٹی مچ آ ملک اٹی 2 لکھ 70 ہزار آن زیات فرنٹ لین ورکرزبشخ ہلکر ہرافتے ٹی پنچ سال آن کم وئی چناتے انسداد پولیو نا پڑی کنفنگا۔ مہم اٹی صوبائی و ضلعی لیڈرشپ پبی بشخ ہلکر وخت اس کہ مہم نا سرسہبی ٹی سیکورٹی ادارہ ، میڈیکل ایسوسی ایشنز، مذہبی راہشون، پنی آ شخصیت و سیاسی راہشونک پبی کڑد ادا کریر۔ جاری بیان اٹی وزیراعظم نا خصوصی کمکار جان جوڑی ڈاکٹر فیصل سلطان پارے کہ ’’داہیت ستاکڑزک کہ مہم نا سرسہبی ٹی ہرمکتبہ فکر پبی کڑد ادا کرے و دادے قومی زمواری تکار، مہم اٹی لمہ و باوہ و فرنٹ لائن ورکرآتا جوزہ ءِ ہرسا نن پاننگ کینہ کہ پولیو نا چٹفنگ کن ہم سہی کنڈآ ہِننگ اُن۔ مہم اٹی داہیت ءِ پک کننگانے کہ اسہ چناس ہم انسداد پولیو پڑی تیان محروم مف تانکہ اوفتے ہلوک آ ناجوڑی آن بچفنگ مرے‘‘۔ جولائی و اگست اٹی چنکو کچ اسے آ چلیفنگوک آ پولیو مہم آتیٹی فرنٹ لائن ورکرآتے کورونا غان بچفنگ نا گام گیج کون آ دوتے سلنگ، ماسک انا کاریم اٹ اتنگ و اجتماعی فاصلہ غا تربیت تننگاسس۔ مہم اٹی حکومت نا کنڈآن کورونا نا بارواٹ تروک آ پارت آتیا عملدرآمد ءِ ہم پک کننگا۔ جاری بیان نا رداٹ جولائی آن ستمبر اسکان مروک آانسداد پولیو مہم آتیٹی چناتے قوت مدافعت اٹ ودکی مسنے۔ ہراڑآن اوفتے دین انا زہم تیان بچفنگ مریک۔ کوآرڈینیٹر قومی ایمرجنسی آپریشنز سینٹر ڈاکٹر رانا محمد صفدر پارینے کہ جولائی، اگست و ستمبر اٹ مروک آ مہم آتیٹی فرنٹ لائن ورکرآک چناتے انسداد پولیو پُڑی کنفنگ اٹ پبی کڑدادا کریر۔ سرسہب مہم لمہ و باوہ غاتا کمک آن بیدس ناممکن ئس۔ اومستی پارے کہ پولیو وائرس نا توننگ کن رکھی ٹیکہ غاک ہم المی ءُ۔ رکھی ٹیکہ غاتیا ہم پبی چکار کننگ انگ ءِ۔ ای پی آئی چناتا رکھی ٹیکہ غاتیا پبی چکار کننگ ءِ۔ کم و ود 8150 ویکسین ٹیم مچ آ ملک اٹ کڑد ادا کننگ ءُ۔ جنوری آن اگست اسکان کم و ود 136 ملین خور تننگانے۔ داکان بیدس کم و ود 699762 ہموچناتے ویکسین تننگا ہرافتے داکان مست ویکسین کُنفنگ تویسس۔ بیان نا رداٹ اکتوبرنا آخیریکو ہفتہ ٹی خاص انگا ضلع غاتیٹی پولیو آن بچفنگ نا پڑی کُنفنگ کن مہم چلیفنگک۔
