گلگت۔ 02 اکتوبر (اے پی پی) وزیراعلیٰ گلگت بلتستان میر افضل خان پارینے کہ 15 نومبر آ مروک آ گچین کاری تے پرامن، ساف و شفاف و بے کنڈ ہلوک کننگ کن غٹ تر تیاری تے حتمی دروشم اس تننگانے و سیکورٹی ادارہ غاتا کمک اٹ نن داوڑ کرسا نشان ایتنہ۔ جمعہ نادے آ وزیراعلیٰ سیکرٹریٹ گلگت اٹی چیف سیکرٹری گلگت بلتستان تون اوار پریس کانفرنس اٹی اوپارے کہ غٹ سیاسی جماعت آتا سرکڑدہ غاتیان خواست ءِ کہ گچین کاری تیٹی کورونا دین آن بچنگ و رکھ اکن جوڑ کروک ایس او پی تیا عملدرآمد کرفنگ کن حکومت تون کمک کیر۔ اوپارے کہ داگچین کاری تے آرمی آن بیدس اڈتننگ والا اُن و اگہ ضرورت تما تو آرمی نا تعیناتی ءِ کننگ مریک۔ اوپارے کہ ننا سیکورٹی نا ایلو ادارہ غاک داقابل ءُ کہ داٹی او سیکورٹی ءِ سنبھالنگ کیر۔ وزیراعلیٰ پارے کہ اگہ نگران وزیر اس اومیتدار یا سیاسی جماعت نا کمپین ءِ کرسا خننگا تو اونا برخلاف سخت کانودی کارروائی کننگک۔ اوپارے کہ غٹ سیاسی جماعت آتا سرکڑدہ غاتے داپاننگ خواوہ کہ او ہوکا تیا اسُل خف توپس و بے سوب کانود ءِ دوٹی ہلپس ۔ چیف سیکرٹری گلگت بلتستان کیپٹن (ر) خرم آغا دا وخت آ گپ وتران کرسا پارے کہ گلگت بلتستان داوخت آ پاکستان اٹ غٹ آن پرامن ڈیہہ ءِ و داڑے فرقہ واریت نا ہچ ءُ ویل اس اف۔ اوپارے کہ نن اسہ سوگو و مربوط سیکورٹی پلان اتون گچین کاری تے کرفنگ والا اُن تانکہ اوفتیا اوکان پد اسہ سیاسی جماعت اس ہم ہور ہرفنگ کپ۔
