اسلام آباد۔ 02 اکتوبر (اے پی پی) وزیر مملکت پارلیمانی امور علی محمد خان غٹ جہانی فورم تیا کشمیر نا وتواجہی نا چٹفنگ کن ہندوستان نا ظالمانہ گام گیج آتے مچ آ دنیا نا مون آ تالان کننگ نا عزم ءِ کرسا پارے کہ ہمو دے مُر اف ہراتم کشمیریک یوم آزادی ءِ اڈ ایترہ۔ نجی نیوز چینل تون گپ وتران کرسا پارے کہ پاکستان سیاسی و سفارتی کہول آ ہم ہندوستانی کماشی ٹی کشمیر اٹی ظالمانہ ریاستی جبر ءِ تالان کرسا کیک۔ اوپارے کہ مقبوضہ کشمیر اٹی ہندوستان نا حالیت آک قابل مذمت ءُ و جہانی برادری نا دمدستی چکار نا گرج ءِ۔ اوپارے کہ پاکستان داتم اسکان کشمیر نا ویل و ظالمانہ بھارتی پالیسی تے تالان کننگ کن بھاز گڑاکرینے و داسکان بھاز گڑاکننگ سلوک ءِ۔ اومستی پارے کہ دا حقیقت ءِ کہ دنیا وخت اس ہم نزورآتون سلتنے۔ اوکشمیری تا ستاءِ کرسا پارے کہ دا بھاز بھلو سرسہبی اسے کہ کشمیری آزادی کن تینا جہد ءِ برجاتخانو و تاریخ نا غٹ آن مریس تحریک آجوئی ءِ۔ علی محمد پارے کہ بھارتی ظالمانہ چہرہ و ہندوتوا نا پالیسیک مہالوآن مون آ بسنو دنیا و جہانی انسانی حق انا تنظیم تے بی جے پی نا کماشی ٹی ہندوستانی حکومت نا امتیازی پالیسی تا تجزیہ ءِ کروئی مریک۔ اوباوری کرفے کہ کشمیریک تدوک آ 90 سال آن تینا مسخت کن تینا جان تے ندر کننگ ءُ و کنے باور ءِ کہ اوفتا قربانیک زیان مفسہ۔ اومستی پارے کہ کنے اومیت ءِ کہ مودی نا فاشزم، ہندوتوا نا پالیسی و نازیزم نا نقش قدم آ چلینگ انگ نا سوب آن ہندوستان بھس مریک انتئے کہ دا دنیا ٹی پدریسہ تنیا مرسا کننگ ءِ۔
