اسلام آباد۔ 01 اکتوبر (اے پی پی) وزیر خارجہ مخدوم شاہ محمود قریشی پارینے کہ بھارت سرکار نا ہندوتوا سوچ گاندھی و نہرو نا سیکولر بھارت ءِ پورووڑاٹ جہہ جاگہ کرینے۔ داہیت ءِ او دربار عالیہ کوٹ مٹھن ناسجادہ نشین خواجہ معین الدین محبوب کوریجہ تون گپ وتران کرسا پارے ہرا پنچ شنبے نادے آ وزارت خارجہ ٹی اوڑتون اوڑدہی کرے۔ اوڑدہی ٹی اتحاد بین المسلمین، مذہبی آہنگی تون اوار تین پہ تینی است خواہی نا باندات آتیا گپ وتران کننگا۔ شاہ محمود قریشی پارے کہ بھارت اٹی اقلیت خاص وڑاٹ مسلمان تا برخلاف ہتک آمیز رویہ نا برخلاف مچ آ دنیا نا مسلمان تیٹی اسہ بے چینی اسے نا کیفیت ءِ۔ بھارت سرکارنا ہندو توا سوچ گاندھی و نہرو نا سیکولر بھارت ءِ پورو وڑاٹ جہہ جاگہ کرینے۔ اوپارے کہ امن دشمن قوت آک، اسہ سجفوک ءُ ڈٹ اسے نا رداٹ، فرقہ واریت ءِ تہو تننگ ءُ۔ فرقہ واریت ناداعفریت ءِ چٹفنگ و بین المذاہب ہم آہنگی ءِ مون آ دننگ کن عالم دین و مشائخ آتا کڑد المی ءِ۔ خواجہ معین الدین کوریجہ دیکی ٹی خاص وڑاٹ ایلو دنیا ٹی بالعموم اسلامو فوبیا نا ودوک آ رجحان نا برخلاف پبی توار بڑزکننگ آ وزیر خارجہ نا منت واری ءِ ہرفے۔
