اسلام آباد۔ 01 اکتوبر (اے پی پی) صدر مملکت ڈاکٹر عارف علوی پارینے کہ اکتوبر نا تُو ہر سال سینہ نا کینسر نا آگاہی نا تُو انا وڑاٹ اڈتننگک، میڈیا و پارلیمنٹ نا باسک آک سینہ نا کینسر نا بابت آگاہی ودی کننگ اٹ تینا کڑد ءِ ادا کیر، سینہ نا کینسر ہرسال لکھ آ زالبول آتا جان ءِ ہلیک۔ پنچ شنبے نادے آ ایوان صدر نا میڈیا ونگ آن جاری بیان نا رداٹ داخیال آتا درشانی ءِ او پاکستان اٹ سینہ نا کیسر نا بابت میڈیا و پارلیمنٹ نا باسک آتے گدریفوک آ چھٹی ٹی کرے۔ صدر مملکت پارے کہ اکتوبر نا تُو ہرسال سینہ نا کینسر نا آگاہی نا تُو انا وڑاٹ اڈتننگک۔ میڈیا و پارلیمنٹ نا باسک آک سینہ نا کینسر نا بابت آگاہی ودی کننگ اٹ تینا کڑدءِ اداکیر۔ سینہ نا کینسر ہرسال لکھ آ زالبول آتا جان ءِ ہلیک۔ اوپارے کہ اولیکو اسٹیج آ تشخیص نا حالیت اٹ کم و ود 98 درسد زالبول دا ناجوڑی آن دراخ جوڑ مریرہ۔ پاکستان اٹ دا ناجوڑی نا سوب آن مرک آتا کچ ایلو سویلی ایشیائی ملک آتا نسبت زیات ءِ۔ پاکستان اٹ زیات مرک آتا کچ انا سوب سینہ نا کینسر نا بابت آگاہی نا مفننگ ءِ۔ اوپارے کہ میڈیا زالبول آتیٹی دا ناجوڑی نا بابت آگاہی ودی کننگ اٹ اہم کڑد ادا کننگ کیک۔ میڈیا اکتوبر اٹ فلاح عامہ نا کلہو، ٹاک شوز و اخبار تیٹی سرحال آتا کمک اٹ آگہی ودی کے۔ صدر مملکت نیوز کاسٹر، اینکرو ٹاک شو تیٹی مہمان تیان اکتوبر نا تُو اٹی پنک ربن بیننگ نا خواست ہم کرینے۔
