اسلام آباد۔ 01 اکتوبر (اے پی پی) امریکہ پاکستانی مصنوعات درآمد کروک آ غٹ آن بھلا درآمد کنندہ ملک ءِ۔ اگست 2020ء ٹی ہم ایلو ملک آتا مقابلہ ٹی غٹ آن زیات برآمدات امریکہ ءِ کننگا ہرافتا کچ 334.5 ملین ڈالر مسنے۔ اسٹیٹ بینک آف پاکستان (ایس بی پی) نا حساب وکتاب نا رداٹ ولے اگست 2019ء نا مقابلہ ٹی اگست 2020ء ٹی امریکہ ءِ کروک آ برآمد آتا کچ اٹ 6.58 ملین ڈالر نا کمتی مسنے۔ اگست 2019ء ٹی امریکہ ءِ 341.08 ملین ڈالر مالیت نا برآمدات کننگاسس۔ ایس بی پی نا رداٹ اینخو مالی سال انا اولیکو اِرا تُو اٹی جولائی، اگست 2020ء ٹی امریکہ ءِ کروک آ ملکی برآمدات 6 درسد کمتی آن 714.63 ملین ڈالر نا مقابلہ ٹی 671.75 ملین ڈالر اسکان کم مس ولے ولدا ہم امریکہ پاکستان آن درآمد کروک آ بھلا ملک مسنے۔ حوال نا رداٹ برطانیہ ارٹ میکو بھلا درآمد کنندہ ءِ ہرادے اگست 2020ء ٹی 129.17 ملین ڈالر نا برآمد کننگا ہرا اگست 2019ء نا مقابلہ ٹی 6.1 درسد کم ئسر۔ اگست 2019ء ٹی برطانیہ ءِ 137.56 ملین ڈالر نا مالیت برآمدات کننگاسس۔ ہنداوڑ چین پاکستانی مصنوعات درآمد کروک آ مسٹ میکو بھلا ملک مسنے ہرادے اگست 2020ء ٹی 93.64ملین ڈالر نا برآمدات کننگا وخت اس کہ متحدہ عرب امارات ءِ 93.21 ملین ڈالر نا برآمدات کننگانے۔ ایس بی پی نا رداٹ اوغانستان ءِ کروک آ برآمدات5.36 درسد ودکی آن اگست 2020ء ٹی 57.873 ملین ڈالر نا مقابلہ ٹی 60.975 ملین ڈالر اسکان ودار۔
