کوئٹہ۔ 30 ستمبر (اے پی پی) صوبائی وزیر خزانہ میر ظہور احمد بلیدی پارینے کہ ملک انا ایلو علاقہ غاتیانبار مکران ڈویژن اٹ بجلی نا ویل ارے ولے گرج داہیت انا ءِ کہ واپڈا کارندہ غاک اسہ عمل نا قابل میکنزم اس جوڑ کیر و بجلی نا نظام اٹ گچینی اتیر تانکہ السی مشکل آتیٹی کمتی مرے و واپڈا نا ریونیو ٹی ہم ودکی مرے۔ داخیال آتا درشانیءِ او ایکسیئن واپڈا ریاض پٹھان تون اوڑدہی ٹی گپ وتران کرسا کرے۔ اوڑدہی ٹی ڈی سی کیچ الیاس کبزئی آن بیدس یونین کونسل شاہرک، ہیرونک و ایلو علاقہ غاتا متبر آتا اسہ بھلو کچ اس ہم ساڑی ئسر۔ صوبائی وزیر خزانہ پارے کہ علاقہ نا متبر آک واپڈا تون بجلی نا بل آتا زرتس اکن ہروڑمدت و کمک کن تیار ءُ ولے واپڈاکارندہ غاتے ہم مرے کہ او کانود نا دنگ اٹ مرسا غیر کانودی کنکشن آتے کاٹ کیر۔ اوپارے کہ بجلی الس نا اسہ بنداوی ءُ ویل اسے کہ ایکسیئن واپڈا ءِ مرے کہ او مخلوق نا روا ویل آتے بِنر و اوفتے ایسر کننگ کن دمدستی گام گیج کیر۔ تانکہ ناخوشگوار واقعہ غاتیان بچنگ مرے۔ اوکان پد ایکسیئن واپڈا ریاض پٹھان صوبائی وزیر خزانہ محکمہ واپڈا نا بارواٹ حوال تس و اودے الس نا روا خواست آتے ایسر کننگ نا باوری کرفسا اسہ جوان ءُ وڑوڈول اسے نا رداٹ کاریم کننگ آ آمادگی ہم ظاہر کرے۔ ایسر اٹ علاقہ نا متبر آتا کنڈآن عبدالغفار گچکی و خان محمد بلوچ ایکسیئن واپڈا ءِ بجلی نا بل آتا زرتس انا وڑوڈول و بجلی نا نظام اٹ گچینی اتنگ کن تینا سلاہ تے تسر۔
