اسلام آباد۔ 30 ستمبر (اے پی پی) خصوصی کمکار راجی رکھ و تخفیف نیزگاری ڈاکٹر ثانیہ نشتر پارینے کہ احساس ایمرجنسی کیش زرتس انا چرجوئی ٹی ہمو اہل بندغ آک ہرافتے ہورتا نشان تا پک کننگ نا ویل مون تروک ءِ او آن لائن احساس پورٹل آ اینو تینادرخواست آتے جمع کرفر۔ تینا ٹویٹ اٹی ڈاکٹر ثانیہ نشتر پارے کہ اینو 30 ستمبر 2020درخواست جمع کرفنگ نا آخیریکو تاریخ ءِ۔ احساس پورٹل اینو نن نا 12 بجہ غا بند مریک۔ احساس ویب پورٹل نا لنک دادے۔ http://complaints.pass.gov.pk ۔ دا پورٹل نا کمک اٹ درخواست تروک آ صارف آتے بینک آتا برانچ آتیٹی زرتس 30 اکتوبر اسکان برجاسلک۔ ہمو خاہوت ہرافتا اہل بندغ آک کزیت کرینو او تینا درخواست ءِ خصوصی کمکار راجی رکھ و تخفیف نیزگاری ڈاکٹر ثانیہ نشتر نا پن براہ راست درخواست گدریفر۔ اینو درخاست آتا مون تننگ نا آخیریکو تاریخ ءِ۔ دادرخواست اتون کزیت کروک آ اہل بندغ نا نادرا(NADRA)آن پک کروک ڈیتھ سرٹیفکیٹ و شناختی کارڈ انا کاپی و خاہوت اٹ ساڑی اہل بندغ نا پن و شناختی کارڈ نا کاپی تے خلنگ المی ءِ۔ درکار درخواست بنام ڈاکٹر ثانیہ نشتر، ایف بلاک، پاک سیکرٹریٹ ، اسلام آباد نا ڈس ونشان آ گدریفنگے۔ تعلقدار بندغ آتے زرتس 30 اکتوبر اسکان برجاسلک۔
