گوادر ءِ ریلوائی لین نا کمک اٹ ملک انا ایلو بشخ آتون گنڈنگک
اسلام آباد۔ 30 ستمبر (اے پی پی) وزیراعظم نا خصوصی کمکار حوالکاری و شینکاری و چیئرمین سی پیک اتھارٹی لیفٹیننٹ جنرل (ر) عاصم سلیم باجوہ پارینے کہ ایم ایل ون نا پوروی آن پد گوادر ءِ ریلوائی لین نا کمک اٹ ملک انا ایلو بشخ آتون گنڈنگک۔ چارشنبے نادے آ تینا بیان اٹی اوپارے کہ سی پیک نا رداٹ گوادر و ایلو ملک انا نیام اٹ رابطہ غاتا ودنگ نا گمان ءِ۔ اوپارے کہ مین لین ون (ایم ایل۔1) انا پوروی آن پد گوادر ءِ سی پیک نا فائدہ غاتیان بہرہ مند کننگ کن ریلوائی لین نا کمک اٹ ملک انا ایلو بشخ آتون گنڈنگک۔ داکان بیدس دا ودوک آ رابطہ سازی آن ملک انا راجی و زرگزرانی تقدیر ہم بدل مریک۔ اوپارے کہ گوادر فری زون خلیجی ڈیہہ آن بھلو زرکاری اسے دانگ اتیک۔ گوادر فری زون آ مروک آ پیش رفت آ گپ وتران کرسا چیئرمین سی پیک اتھارٹی عاصم سلیم باجوہ خلیجی ملک آتیان دا زون اٹ زرکاری نا گمان آتا پیدواری ءِ کرے۔ گوادر فری زون 2400 ایکڑ رقبہ غا تالان ءِ ہراٹی بھلا صنعتی یونٹ آتا میزبانی ءِ کننگ نا لائخی ارے۔ اوگوار ایئر پورٹ آ ہم گپ وتران کرے ہرا چینی حکومت نا کمک اٹ تفنگ انگ ءِ۔
