اسلام آباد۔30 ستمبر (اے پی پی) وزیراعظم نا خصوصی کمکار سیاسی ابلاغ ڈاکٹر شہباز گل حزب اختلاف نا جماعت آتے تنقید نا نشانہ کرسا پارینے کہ مسلم لیگ (ن) الس نا چکار ءِ تینا برخلاف وڈی خوری نا مقدمہ غاتیان اسہ کنڈکننگ کن شورشرابہ کننگ ءِ۔ نجی نیوز چینل تون گپ وتران کرسا اوپارے کہ مسلم لیگ (ن) نا وڈی خور سرکڑدہ الس ءِ ریفنگ و دروغ انا پروپیگنڈا کننگ اٹ اختہ ءِ۔ اوپارے کہ عدالت اودے ارب آ روپئی نا وڈی خوری کننگ آ سزا بنفینے۔ ڈاکٹر شہباز گل نا پاننگ ئس کہ نواز شریف مجرم ءِ ہرا دروغ تڑسا ملک آن نرا۔ او تینا پارٹی نا باسک آتے پارت کننگ نا ہچ ءُ حق اس تخپک۔ اوپارے کہ وزیراعظم عمران خان دا عزم انا درشانی ءِ کرینے کہ شریف خاہوت تون اوار اسہ ہم وڈی خور راہشون اسے این آر او تفننگک۔ اومستی پارے کہ نن نواز شریف ءِ این آر او تفنہ و مسکوہی حکمران تا پلوک آ قومی دولت ءِ ہر قیمت آ اوڑآن پدی ہلنگک۔ اومستی پارے کہ الس مافیہ غاتیان بلد ءُ۔ اوپارے کہ شریف خاہوت و مسکوہی صدر آصف علی زرداری نا خاہوت نا ہچ ءُ سیاسی آخبت اس اف۔ داتسکان کہ اوفتا چناک ہم دادے امنا کیرہ۔ اونواز شریف ءِ مشورہ تس کہ او قومی ادارہ غاتیا پت کے و تینا برخلاف مقدمہ غاتون مون تننگ کن ملک آ پدی برے۔ اوپارے کہ اوفتا حکومت وزیراعظم عمران خان نا وژن نا رداٹ السی خذمت اٹ لگوک ءِ۔ جہانی برادری السی خذمت آتیکن وزیراعظم عمران خان نا حکمت عملی ءِ امنا کرینے، شہباز گل پارے کہ اسٹ اسے ہم ریاست نا برخلاف چم کننگ نا موکل تفننگک۔
