اسلام آباد ۔ 30 ستمبر (اے پی پی) مزن وزیر عمران خان ءَ گوشت کہ گوستگیں وھد ءَ کتگیں گرانیں نیاد ءِ توان آںی منوگری آنی بار ءَ چہ نا ایوک ءَ لس مردم ءُ صنعتی شوبگ آناں سک باز تاوان رستگ بلکینگ ءَ چکروکیں وام آنی بار آوانی سر ءَ کپتگ، سبسڈی ءِ نظام ءَ را ساپ ءُ سلہ، ءُ بزگر آناں کمک پجاری ءِ رد ءَ ھاسیں دلگوشی دیگ بہ بیت۔ اے ھیالانی درشانی آئی ءَ ھاٹیگ ءِ شوبگ ءَ جاڑیگیں گہتری کار آنی ھوالگ ءَ چار ءُ تپاسی دیوان ءِ سروکی ءَ کنان ءَ کت۔ بنجاھی وزیر اسد عمر، عمر ایوب، میاں محمد سومرو، مشیر ھزانگ ڈاکٹر عبدالحفیظ شیخ، ھاسیں کمکار شہزاد قاسم ، ندیم بابر ءُ ڈاکٹر ثانیہ نشتر ءُ ایندگر کلانہ ایں اپسرگ آں بھر زوری کت۔ دیوان ءَ ھاٹیگ ءِ شوبگ ءَ جاڑٰیگیں گہتری کار آناں گیش دیمروئی دیگ ءُ اے ھوالگ ءَ جتا جتائیں سیم سر آنی در جنگ ءِ واستہ گیشینتگیں فریم ءِ ھوالگ ءَ مزن وزیر ءَ را سرجمیں رنگ ءَ بریفنگ دیگ بوت۔ مزن وزیر ءَ دیوان ءَ گوں گشتانک دیان ءَ آئی ءَ گوشت کہ ھاٹیگ ءِ شوبگ ءَ سک باز ڈکالی ءِ آماچ انت۔ آئی ءَ گوشت کہ گوستگیں وھد ءَ کتگیں گران قیمتی توان ءِ منوگری آنی بار ءَ چہ نا ایوک ءَ لس مردم ءُ صنعتی شوبگ آماچ بوتگ انت بلکینگ ءَ سستائیں توان ءِ پجاری کنگ ءَ کوشست ھم چکروکیں وام آنی بار سر ءَ سوار بوتگ ایشی یے سرجمیں بار ءُ تاوان سرکاری ھزانگ ءِ سر ءَ پر بوتگ انت۔ مزن وزیر ءَ پنت ءُ شون کت کہ سبسڈی ءِ نظام ءَ را گہتر ءُ ساپ ءُ سلہ ئی ءُ بزگریں آنی شریں رپک ءَ آسراتی پجاری ءَ ھاسیں دلگوشی دیگ بہ بیت۔ مزن وزیر ءَ پنت ءُ شون کت کہ توان ءِ شوبگ ءَ گہتری ءِ ھوالگ ءَ توان ءِ پیداوار ، ضلورت، سال ءِ جتا جتائیں ماھ آنی تہ ءَ کارمردی ءَ برز ءُ جھل ءِ کساس ، ھرچ ءُ درچ، بھا ءُ سیم ءُ ریونیو ءُ توان ءِ قیمت آنی سبب ءَ ایندگر شوبگ آںی تہ ءَ رند پد ءَ ھوار جتا جتائیں بھر آنی رد ءَ گامگیج ءُ روڈ میپ ءِ گیشینگ بہ بیت تانکہ ناں ایوک ءَ اے شوبگ ءِ ڈکالی ءَ چہ در کنگ بہ بیت بلکینگ ءَ اے رنگیں کار رپک کنگ بہ بیت کہ توامیں شوبگ آنی ھاٹیگ ءِ ضلورت جوانیں رنگ ءَ پیلو کنگ بہ بنت۔
