کوئٹہ۔ 29 ستمبر (اے پی پی) وزیراعلیٰ بلوچستان جام کمال خان تون گورنر پنجاب چوہدری محمد سرور نا وزیراعلیٰ سیکرٹریٹ اٹی اوڑدہی ، اوڑدہی ٹی ہڑتوم آ راہشون تا نیام اٹ بین الصوبائی ہم آہنگی نا مون آ دننگ تون اوار تین پہ تینی است خواہی نا ایلو باندات آتیا گپ وتران کننگا۔ داوخت آ پنجاب نا تعلیمی ادارہ غاتیٹی بلوچستان نا طالب علم آتا جتا کوٹہ ٹی ودکی و بہاؤالدین زکریا یونیورسٹی ملتان اٹی خوانوک آ بلوچستان نا طالب علم آتا ویل آتا بابت ہم گپ وتران کننگا، اوڑدہی ٹی دا ہیت آ امنا کننگاکہ صوبہ غاتا نیام اٹ ہم آہنگی و تین پہ تینی کمکاری ءِ مون آ دننگ ملک انا سوگوی کن المی ءِ، اوڑدہی ٹی ڈپٹی اسپیکر بلوچستان اسمبلی و صوبائی وزیر آک ہم ساڑی ئسر۔ داوخت آ گورنر پنجاب چوہدری محمد سرور گپ وتران کرسا پارے کہ بلوچستان ءِ تینا ارٹ میکو اُراسرپند کیوہ داڑے برسا مدام خوشی محسوس مریک انتئے کہ بلوچستان نا مخلوق محب وطن ، مہمان نواز و مہرومریبت کروک آ مخلوق ءُ۔ اوباوری کرفسا پارے کہ بلوچستان نا طالب علم آتا ویل آتا ایسری کن تینا کڑد ءِ ادا کیوہ۔ اوپارے کہ شونداری ڈٹ آتا بابت کوئٹہ ٹی بھاز بھلو بدلی اس خننگ اُٹ صوبہ ٹی امن و شونداری کن دعا کیوہ۔ وزیراعلیٰ بلوچستان گورنر پنجاب ءِ بلوچستان اٹ برجا شونداری عمل و امن و ایمنی نا گچینی نا بابت حوال ترساپارے کہ پنجاب و بلوچستان نا نیام اٹ تعلقداری و کمکاری ٹی تدوک آ اِراسال اٹی بے مٹ ودکی مسنے۔
