لاہور۔ 29 ستمبر (اے پی پی) پاکستان تحریک انصاف نا سینئر مرکزی راہشون و مسکوہی بنجائی وزیر ہمایوں اختر خان پارینے کہ وزیراعظم عمران خان ملک آن ہروڑنا کرپشن نا بج ءِ ناپید کننگ کن سنبرینگوک ء،خدارا اپوزیشن تینا بقاء کن قومی ادارہ غاتے سیاست اٹ چکپ، الس حکومت ءِ پنچ سال اکن گچین کرینے۔ داخیال آتا درشانی ءِ او تینا دفتر اٹی حلقہ این اے 131 و نیامی پنجاب آن تعلق تخوک آ پارٹی راہشون آتا ڈل اتون گپ وتران کرسا کرے۔ اوپارے کہ قومی احتساب بیورو حکومت نا زیر اثر اف بلکن وتواجہ ءُ ادارہ اسے ولے اپوزیشن سٹی انگا پروپیگنڈا تا کمک اٹ الس ءِ ریفنگ خواہک ہراٹی اودے بے سہبی ملانے۔ ہنداوڑ کس اسے نا ضمانت ہلنگ یا مسترد کننگ نا اختیار ہم فاضل عدالت آتون ءِ ولے مسلم لیگ (ن) نا کنڈآن ہراوڑنا ہیت کننگ انگ ءِ اوفتیا مچ آ قوم حیران ءِ۔ اوپارے کہ برانز کننگ اپوزیشن نا حق ءِ ولے الس نا جان و مال و سرکاری تنصیب آتا رکھ حکومت و کانود نافذ کروک آ ادارہ غاتا زمواری ءِ ہرادے پورو کننگک۔ اوپارے کہ وزیراعظم عمران خان نا پیدوار فیصلہ ءِ کہ ننے ملک آن ہروڑنا وڈی خوری نا ناسورءِ ماس کش کروئی ءِ و داڑکن دانا بج ءِ ناپید کننگک، دانا کسر اٹ چک و تاڑ کروک آتے آئین و کانود نا شکنجہ ٹی ہلنگک۔
