اسلام آباد۔ 29 ستمبر (اے پی پی) وزیر مملکت و چیئرمین زرکاری بورڈ عاطف بخاری پارینے کہ ملک اٹ زرکاری، زرگزران شونداری، روزگار نا وارخواہی ودی کننگ، صنعتی شونداری و پاکستان اٹ برآمدی پیدوار ءِ مون آ دننگ کون آ ہدف آتا دوئی کننگ کن کوشست کننگ اُن، سی پیک نا ارٹ میکو مرحلہ ٹی نجی بشخ مون آ برسا قائدانہ کڑد ادا کے۔ سے شنبے نادے آ تینا بیان اٹی اوپارے کہ رشکئی اقتصادی زون انا شونداری معاہدہ غا دستخط آن ملک اٹی پوسکن آ زون تا جوڑ کننگ کن کسر آوار مریک۔ اقتصادی زونک اسہ شونہال و صنعتی پاکستان نا سوب مریرہ۔ اوپارے کہ ٹیکسٹائل انجینئرنگ، بجلی و الیکٹرانکس، کیمیکل پینٹ، کشت و کشار و فوڈ پروسیسنگ، اسٹیل و پیکجنگ نا بشخ اٹی صنعت جوڑ کننگک۔ سی پیک نا رداٹ جوڑ مروک آ زون تیا بھلو پیش رفت اس مسنے۔ زونک داسہ کاروبار کن تیار مننگ ءُ۔ پاک چین جغرافیائی قربت دا اقتصادی زون تا آبادکاری و تین پہ تینی زرگزرانی فائدہ غاتا دوئی کننگ اٹ کمکار مریک۔ زرکاری بورڈ اقتصادی زون تے غٹ آسراتی تا فراوانی تننگ نا عمل ءِ ترند کرینے۔
