اسلام آباد۔ 29 ستمبر (اے پی پی) اسپیکر قومی اسمبلی اسد قیصر پارینے کہ کنوئی آ ساف دیر انا فراوانی السی نمائندہ غاتا اولیت مرے۔ ایلو شونداری ڈٹ آتا نسبت کنوئی آ ساف دیر انا فراوانی آ زیات چکار کننگے، بلوچستان اٹی دیر انا زیات کاختی مون تروک ءِ، چنکا ڈیم تا تفنگ آن دا ویل انا مون ءِ توننگ مریک۔ سے شنبے نادے آ داڑے حفظان جان جوڑی نا سرحال آ موسمیاتی بدلی نا وزارت نا کنڈآن اڈ ہلوک آ ورکشاپ آن تینا بنائی تران اٹی اسپیکر قومی اسمبلی پارے کہ کنوئی آ ساف دیر ہر انسان نا بنداوی گرج ءِ، تدوک آ دور حکومت اٹ بطور اسپیکر صوبہ ٹی ساف دیر اکن چندی گام گیج کریٹ۔ اوپارے کہ کنوئی آ ساف دیر انا فراوانی السی نمائندہ غاتا اولیت مرے، السی نمائندہ غاک ایلو شونداری ڈٹ آتا نسبت الس ءِ کنوئی آ ساف دیر انا فراوانی ءِ ممکن کننگ آ زیات چکار کیر۔ اوپارے کہ ایلو صوبہ غاتا نسبت بلوچستان ءِ دیر انا زیات کاختی مون تروک ءِ۔ بلوچستان اٹی دیر انا ڈغار اٹی کچ 11 سد فٹ ءِ۔ چنکا ڈیم تا تفنگ آن کنوئی آ ساف دیر انا کاختی نا مون ءِ توننگ مریک۔ اوپارے کہ صوبہ ٹی کنوئی آ ساف دیر اکن چنکو ڈیم تفنگانے۔ چنکا ڈیم تا سوب آن نئے بیرہ دا علاقہ غاتیٹی ساف دیر انا فراوانی ممکن مس بلکن ڈغار نا تہہ ٹی دیر انا کچ اٹ ودکی مسنے۔ اسد قیصر پارے کہ آخبت اٹ دنیا ٹی غٹ آن زیات جھیڑہ دیر آ مریک۔ اوپارے کہ تعلیم، جان جوڑی و ساف دیر انا آسراتی تیا خصوصی چکار کننگ نا گرج ءِ۔ اسہ جان جوڑ راج اسے نا ٹہیفنگ کن حفظان جان جوڑی نا بنداوی اصول آتیا عمل کننگ نا گرج ءِ، حکومت آتون اوار اوار جہانی ادارہ غاتے ہم دا آسراتی تا فراوانی کن کڑد ادا کروئی مریک۔ اسد قیصر پارے کہ پاکستان اٹی 52 درسد آبادی ءِ ساف دیر، سفائی و حفظان جان جوڑی نا آسراتی دُوبروک اف۔ کنوئی آ ساف دیر اسکان آسانی رسینگ پاکستان نا آئین نا رداٹ بنداوی حق انا بشخ مرے۔ اوپارے کہ جان جوڑی، سفائی نا آسراتی تسکان رسینگ اٹ کمتی الس نا جان جوڑی و تندرستی خاص وڑاٹ چناو زالبول آتا جان جوڑی و تندرستی آ خراب زہم تخک۔ سفائی نا بارواٹ آگاہی المی ءِ۔ حکومت تون اوار اوار میڈیا و فلاحی تنظیم تے ہم سفائی نا بارواٹ زیات آن زیات بشخ ہلنگ نا گرج ءِ۔ اوپارے کہ پائیدار شونداری ہدف آتا رداٹ 2030 ء اسکان ملک انا غٹ آبادی کن کنوئی آ ساف دیر انا بست وبند ءِ کننگ المی ءِ۔ ورکشاپ اٹی وزیر مملکت موسمیاتی بدلی زرتاج گل، پارلیمنٹ نا باسک آک، صوبائی اسمبلی تا باسک آک، سول سوسائٹی و میڈیا نا نمائندہ غاک بشخ ہلکر۔
