اسلام آباد۔ 29 ستمبر (اے پی پی) وزیر خارجہ مخدوم شاہ محمود قریشی پارینے کہ نن اوغانستان نا تہہ نا باندات آتیٹی نیام تمنگ خواپنہ، مذاکرات اٹی اوغان الس نا فیصلہ نا ستاءِ کینہ۔ سے شنبے نادے آ انسٹیٹیوٹ آف اسٹریٹجک اسٹڈیز اسلام آباد اٹی اڈ ہلوک آ کانفرنس آن تران کرسا وزیر خارجہ پارے کہ چیئرمین بڑزکو کہولی مفاہمتی کونسل ڈاکٹر عبداللہ عبداللہ اوغانستان تون وابستہ غٹ حالیت آتیان پورو آگاہی تخک۔ اوپارے کہ اوغانستان اٹی مفاہمتی عمل نا سرسہبی ءِ تینا سرسہبی سرپند کینہ۔ ڈاکٹر عبداللہ عبداللہ تون وزارت خارجہ ٹی اوڑدہی ٹی اوغان امن عمل نا بابت سرجم گپ وتران مس۔ وزیر خارجہ پارے کہ اوغانستان اٹی امن پاکستان کن بھاز اہمیت تخک۔ ڈیہہ ٹی امن، اوغانستان نا امن تون گنڈوک ءِ۔ اوپارے کہ اینو جہانی برادری اوغان ویل انا سیاسی ایسری نا مخ تفی ءِ کننگ ءِ۔ اوغان سرکڑدہ دا نادر موقع غان فائدہ ہرفسا اوغانستان اٹ آخبتی و سوگو امن نا کوشست آتے ایسر اسکان سرکے۔ 12 ستمبر آ کابل اٹ پاکستان و اوغانستان نا نیام اٹ اوغانستان پاکستان ایکشن پلان(اپیپس)نا ارٹ میکو دور سرسہبی اٹ پورو مس۔ کابل و اسلام آباد ءِ امن کن مون آ بروئی مریک۔ وزیر خارجہ پارے کہ امریکی وزیر خارجہ بجاوڑاٹ پاریسس کہ ڈیہہ ٹی امن نا کسر کابل آن گدرینگک۔ ننے امن نا دا کوشست آتے نسخان تروک آتیان باخبر مروئی مریک۔ اوغان امن عمل، علاقائی شونداری کن المی ءِ۔ نن اوغان باہوٹ آتا باعزت وباوقار وطن آ پدی ہِننگ نا است خواہ اُن۔ گچین آخبت کن، ننے مستین نا غلطی تے گیرام کرسا مون آ بروئی مریک۔ وزیر خارجہ پارے کہ نن اوغانستان نا تہہ نا باندات آتیٹی نیام تمنگ خواپنہ۔ نن مذاکرات اٹ اوغان الس نا فیصلہ نا ستاءِ کینہ۔
