اسلام آباد۔ 28 ستمبر (اے پی پی) بلوچستان حکومت صوبہ نا 770 کلومیٹر کرکی پٹی تون اوار اوار سیل و سوات نا آسراتی ٹی ودکی کرسا کٹیاتیکن ماسٹر پلان اس تیار کرینے۔ دوشنبے نادے آ بلوچستان حکومت نا عہدیدار پارے کہ حکومت 770 کلومیٹر کرکی پٹی نا گچینی و جوڑ کننگ کن 150 ملین روپئی جتا کرینے۔ وخت اس کہ بلوچستان نا کرکی علاقہ غاتیٹی زرکاری و سیل و سوات بھلو وارخواہی اس ساڑی ءِ۔ بلوچستان حکومت صوبہ نا کرکی پٹی نا شونداری و گچینی آ خصوصی چکار کننگ ءِ۔ اوپارے کہ حکومت صوبائی کرکی علاقہ غاتا سیل وسواتی ہندآتا پیدواری ءِ کننگ و ہموڑے سیل و سواتی ہنکین جوڑ کننگ نا ڈٹ اس جوڑ کرینے۔ اوپارے کہ صوبائی حکومت سیل و سواتی تے بنداوی آسراتی تا فراوانی کن متاماری کننگ ءِ و کرکی پٹی ٹی چاگڑدی سیل و سوات نا مون آ دننگ و شونداری کن فزیبلٹی اس تیار کننگ ءِ۔ اومستی پارے کہ بلوچستان نا کرکی علاقہ غاتیٹی ماحولیاتی سیل و سوات ءِ مون آدننگ کن اسہ ہزار ملین روپئی نا خڑچ آن 7 سیل وسواتی ریسارٹ جوڑ کننگک۔ اوپارے کہ اسہ ہزار ملین روپئی نا خڑچ آن کوسٹل ہائی وے آ 10 ہند آتیا پوسکن آسراتی والا ریسٹ ایریا جوڑ کننگک۔ صوبہ ٹی بروک آسیل و سواتی تے ساحل سمندر آ سیل وسوات فراوان کننگ، اسہ ہزار ملین روپئی نا خڑچ آن ہشت جیٹیز ہلنگک ہرا ماہی گیری نا مسخت آتیکن ہم کاریم اٹ اتنگ مریرہ۔ اوپارے کہ ماہی گیر آتیکن بلوچستان گرین بوٹس اسکیم ہم 500 ملین روپئی نا خڑچ آن صوبہ ٹی بناکننگک۔ حکومت کرکی علاقہ غاتیٹی پنچ بیچ پارکس جوڑ کننگ نا ہم ڈٹ اس جوڑ کرینے۔ وخت اس کہ دا مسخت کن اینخو سال 250 ملین روپئی جتا کننگانے۔ اینخومالی سال اٹی کرکی سیل و سواتی ہند آتیا ریسٹ ہاؤس، ریسٹورنٹ، موٹلز، جہانی فاسٹ فوڈ چینیز، واش روم و ہلہلہ ئی رسپانس ہند آتاجوڑ کننگ کن 150 ملین روپئی تخنگانے۔ اومستی پارے کہ دا ریسٹورنٹ آتے بنداوی انفراسٹرکچر سپورٹ سسٹم و کنوئی نا ساف دیر انا فراوانی کن اسہ جامع حکمت عملی اس تیار کننگانے۔ اوپارے کہ ماہی گیری بلوچستان نا کرکی علاقہ غاتیٹی مخلوق کن روزگار نا غٹ آن بھلا ذریعہ ءِ۔ اومستی پارے کہ کرکی علاقہ غاتیٹی 8 فشنگ زون جتا کننگ کن 200 ملین روپئی نا خڑچ آن فزیبلٹی سٹڈی کننگ انگ ءِ۔ اومستی پارے کہ سمندری حیارت نا رکھ اکن درخت خلنگ نا کاریم برجاءِ و گوادر اٹ سن سیٹ پارک ہم تفنگ انگ ءِ۔
