اسلام آباد۔ 28 ستمبر (اے پی پی) چیئرمین سینیٹ محمد صادق سنجرانی تون بلوچستان ناپنی آ سائیکلسٹ عطاء اللہ پارلیمنٹ ہاؤس اٹ اوڑدہی کرے۔ سینیٹ سیکرٹریٹ نا رداٹ سائیکلسٹ عطاء اللہ امن و یکجہتی ءِ مون آ دننگ کن سائیکل آ سوار مرسا مچ آ ملک اٹ امن نا کلہو ءِ تننگ کن پیش تمانے۔ اواوڑدہی ٹی چیئرمین سینٹ ءِ تینا مشن نا بارواٹ معلومدار کرے۔ اوپارے کہ 14 اگست 2020ء آ سائیکل آ دا سفر کوئٹہ غان بناکرے و داتم اسکان مچ آ ملک انا غٹ صوبہ و بھلا شار تا چکر ءِ پورو کرینے و دا چرجوئی ٹی 25 ستمبر آ بنجائی دارالحکومت اسلام آباد آ سرمسنے۔ سائیکلسٹ عطاء اللہ پارے کہ کنا مسخت امن و یکجہتی ءِ مون آ دننگ نا ءِ و ہندامشن ءِ ہلسا ای شار شار، گلی گلی تینا کلہو ءِ لس کننگ کن پیش تمانٹ۔ چیئرمین سینیٹ محمد صادق سنجرانی سائیکلسٹ عطاء اللہ نا دا کوشست ءِ خراج تحسین پیش کرے۔ اوپارے کہ مچ آ قوم دا بے مٹ کوشست آتا معترف ءِ۔ چیئرمین سینیٹ پارے کہ پاکستان نا پارلیمان، حکومت و الس امن نا خاطر یکجہتی و یکجہتی نا خاطر امن نا اہمیت ءِ امنا کیرہ و ایوان بالانا مسخت ہم بنجائی اکائی تا نیام اٹ یکجہتی ءِ مون آ دننگ نا ءِ۔ اوسائیکلسٹ عطاء اللہ نا دا کوشست آتا ستاءِ کرے و اونا است بڈی ءِ کرے۔ اوپارے کہ ساڑی حالیت آتے مون آ تخسا بین الصوبائی یکجہتی نا سخت گرج ءِ و داڑکن ننے اواری اٹ کاریم کروئی مریک۔
