اسلام آباد۔ 28 ستمبر (اے پی پی) وزیر خارجہ مخدوم شاہ محمودقریشی تون ڈاکٹر عبداللہ عبداللہ نا اوڑدہی ٹی اوغان مفاہمتی عمل، بین الاوغان مذاکرات و تین پہ تینی است خواہی نا ایلو باندات آتیا گپ وتران کننگا۔ وزیر خارجہ مخدوم شاہ محمود قریشی دورہ پاکستان آ بروک آ اوغان بڑزکو کہولی مفاہمتی کونسل نا چیئرمین ڈاکٹر عبداللہ عبداللہ و ڈل انا شرف اٹ وزارت خارجہ ٹی دے انا اِرغ اس کرے۔ وزیر خارجہ مخدوم شاہ محمود قریشی و اوغان بڑزکو کہولی مفاہمتی کونسل نا چیئرمین ڈاکٹر عبداللہ عبداللہ نا نیام اٹ وزارت خارجہ ٹی غیر رسمی گپ وتران مس۔ قومی اسمبلی نا قائمہ کمیٹی امور خارجہ احسان اللہ ٹوانہ ہم داوخت آ ساڑی ئس وخت اس کہ سیکرٹری خارجہ سہیل محمود، مسکوہی سیکرٹریز، سفیر آک ہم ساڑی ئسر۔ داکان مست اوغانستان نا بڑزکو کہولی مفاہمتی کونسل نا چیئرمین ڈاکٹر عبداللہ عبداللہ نا ڈل اتون اوار وزارت خارجہ غا سرمننگ آ وزیر خارجہ مخدوم شاہ محمود قریشی شرفمند آ مہمان و اونا ڈل ءِ بخیر کرے۔ ڈاکٹر عبداللہ عبداللہ نا بطور چیئرمین مفاہمتی کونسل، پاکستان نا دا اولیکو دورہ ءِ۔ چیئرمین اوغان مفاہمتی کونسل ڈاکٹر عبداللہ عبداللہ داوخت آ وزارت خارجہ نا لان اٹ نیال اس ہم خلک۔ اوغان ڈل اٹی اوغان قومی مفاہمت کونسل نا مرکزی عہدیدارآک اوار ئسر۔ چیئرمین اوغان مفاہمتی کونسل ڈاکٹر عبداللہ عبداللہ وزارت خارجہ ٹی وزیر خارجہ مخدوم شاہ محمود قریشی تون اوڑدہی کرے۔ دااوڑدہی ٹی اوغان مفاہمتی عمل، بین الاوغان مذاکرات و تین پہ تینی است خواہی نا ایلو سرحال آتا بابت سرجم گپ وتران کننگا۔ ڈاکٹر عبداللہ عبداللہ انسٹیٹیوٹ آف سٹریٹجک سٹڈیز آن ہم تران کیک۔ تینا مسہ دے ئی دورہ پاکستان اٹ ڈاکٹر عبداللہ عبداللہ وزیراعظم عمران خان، صدر عارف علوی، چیئرمین سینیٹ صادق سنجرانی، اسپیکر قومی اسمبلی اسد قیصر و ایلو اہم شخصیت آتون اوڑدہی کیک۔
