اسلام آباد۔ 28 ستمبر (اے پی پی) صدر مملکت ڈاکٹر عارف علوی پارینے کہ مستین وڈی خوری و غلط فیصلہ غاک ملکی زرگزران ءِ نسخان تسر، ساڑی دور حکومت اٹ غٹ فیصلہ غاک تعلقدار کڑدہ غاتا سلابت اٹ کننگرہ۔ حکومت نا کاریم غٹ ءِ بریبر وارخواہی فراوان کننگ مریک۔ حکومت ہزگار آتیان خراج ہلیک و نیزگارآتیا خڑچ کیک۔ ننے تینا مصنوعات آتا برانڈنگ و ویلیو ایڈیشن آ چکار کننگ نا گرج ءِ۔ ننے دنیا ٹی تینا پوریاگر آتیکن پت سازی ءِ مون آ دروئی مریک، واپار نا بنداو آ کشمیر و فلسطین اٹ مروک آ بیدادی تے گوجالنگک۔ او دوشنبے نادے آ ایوان صنعت و واپار فیصل آباد نا سالانہ دود آن تران کریکہ۔ صدر مملکت پارے کہ زرگزرانی شونداری ٹی ایوان صنعت و واپار فیصل آباد نا اہم ءُ کڑد اسے، دا فعال ءُ ادارہ اسے و دانا باسک آک مثبت سوچ اتون حکومت نا راہشونی ءِ کیرہ۔ اوپارے کہ نن تینے عقل کل سرپند کینہ ولے دین اسلام اٹ سلابت نا تلقین کننگانے۔ اوپارے کہ نن جتا سوچ و ہیت و گپ نا انداز آن پد ہم اخلاق نا دنگ اٹ رہینگن۔ اوپارے کہ پالیسی سازی ٹی سلابت بھاز اہمیت تخک، مستین وڈی خوری و غلط فیصلہ غاک ملکی زرگزران ءِ نسخان تسر، ساڑی آ دور حکومت اٹ غٹ فیصلہ غاک تعلقدار کڑدہ غاتا سلابت اٹ کننگرہ و اوفتا ویل آتے ایسر کننگک۔ صدر مملکت پارے کہ قومک سیوت اٹ شون ہلیرہ، کورونا دین اٹی قوم سیوت و حکومت گچین فیصلہ سازی نا درشانی ءِ کرے۔ اللہ نا پاکستان آ احسان ءِ کہ نن کورونا نا دین انا سرسہبی اٹ مون ءِ تورین۔ وزیر اعظم عمران خان کورونا نا دین اٹی نیزگار و مزور آتااحساس کرے، صنعت آتے بند کتو، پورو لاک ڈاؤن کتو ہرانا مسخت ئس کہ نیزگار آتا روزگار زہمی مف، ہنداوڑ حکومت دا دین اٹی اسہ کروڑ 69 لکھ خاہوت آتیٹی 12 ہزار روپئی فی خاہوت مالی کمک بشخا، رہینگ انگ کن جاگہ جوڑ کرے، سخیک ملوک آ است اٹ نیزگارآتا کمک ءِ کریر۔ عبادت نا جاگہ غاک ملوک ئسر۔ کورونا نا دین انا برخلاف دا قوم انا سرسہبی ءِ۔ حکومت ءِ کورونا دین انا مون ءِ توننگ تون اوار اوار پسماندہ تپہ نا مشکل آتا احساس ئس، کورونا نا دین آن پد ہم برآمد آک ودار، کرنٹ اکاؤنٹ نسخان کم مس، پیشن نا ملک آن ترسیلات زراٹ ودکی مس، مستین اٹ ہلوک آ وام تے تننگا۔ پاکستان نا نسبت ہمسایہ ملک کورونا دین آن زیات زہمی مس۔ اوپارے کہ حکومت کورونانا توننگ کن کروک آ گام گیج آتے جہانی کہول آ اسٹ بڈی ملا۔ اوپارے کہ حکومت نا کاریم غٹ ءِ بریبر وارخواہی فراوان کننگ مریک، حکومت ہزگار آتیان خراج ہلیک و نیزگار آتیا خڑچ کیک۔ دا باندات اٹی وڈی خوری تکلیف نا سوب ءِ۔ اوپارے کہ زرگزرانی سرجزآتا مون آ دننگ، تعلیم و روزگار نا وارخواہی فراوان کننگ حکومت نا زمواری ءِ۔ فیصل آباد اٹی خصوصی اقتصادی زون انا جوڑ کننگ آن زرکارآتے زرکاری نا بھلو وراخواہی اس دُوبریک۔ اوپارے کہ ملک اٹ سمارٹ فون تیار مننگ بناکرینے، ورناتے آئی ٹی نا بشخ انا کنڈآ اتنگ نا گرج ءِ۔ ننے تینا مصنوعات آتا برانڈنگ و ویلیو ایڈیشن آ چکار کننگ نا گرج ءِ۔ اوپارے کہ ننے دنیا ٹی تینا پوریاگر آتیکن پت سازی ءِ مون آ دروئی مریک۔ واپار نا بنداو آ کشمیر و فلسطین اٹ مروک آ بیدادی ءِ گوجالنگک، نن اسلامی و اخلاقی قدر آ عمل آ تینا کاروبار و واپار ءِ مون آ دننگ کینہ و اومیت ءِ کہ پاکستان زوت دنیا ٹی بھلو قوم اس مرسا مون آ بریک۔
