مہمند۔ 28 ستمبر(اے پی پی) وزیراعظم عمران خان پارینے کہ ملک دشمن واکدارک جتا وڑوڈول آتے اٹ بے چیٹی ودی کننگ نا کوشست کیرہ، ننا پورو کوشست ءِ کہ اوغان امن عمل سرسہب مرے، اوغان امن عمل نا سرسہبی آن ڈیہہ ٹی زرگزرانی شونداری نا پوسکن آ دور بناکیک۔ داخیال آتا درشانی ءِ او دوشنبے نادے آ مہمند اٹی قبائلی سرکڑدہ غاتیان تران کرسا کرے۔ وزیراعظم پارے کہ نظریہ و پالیسی سازی آن حکومت نا سمت انا تعین مریک۔مدینہ نا ریاست ہرااصول آتیا سلوک ئس ہمو کنا نظریہ ءِ۔ دنیانا تاریخ نا اولیکو فلاحی ریاست ءِ جوڑ کننگا ہراٹی جنوزان، چوری، بزرگ و غریب آتا راجی آسراتی نا زمواری ئس کہ نزور تپہ ءِ بڑزا اتیر انتئے کہ نزور تپہ ءِ کمک نا گرج مریک۔ اوپارے کہ مدینہ ٹی دنیا نا تاریخ نا اولیکو اسلامی فلاحی ریاست ءِ جوڑ کننگا۔ جنوزان، چوری، بزرگ و غریب آتا راجی آسراتی ریاست نا زمواری ئس۔ قائد اعظم محمد علی جناح نا وژن ہم اسلامی فلاحی ریاست ئس۔ اوپارے کہ ننا کوشست ءِ کہ نزور تپہ ءِ بڑزا دین دابابت پالیسی جوڑ کرسا الس نا راجی آسراتی آ چکار کرینن۔ اوپارے کہ بلوچستان قبائلی علاقہ و پنجاب نا پسماندہ علاقہ غاتا شونداری اولیت ءِ۔ اوپارے کہ سندھ انا تہہ آن وونٹ ہلوک آ بروک آ پارٹی کراچی نا شونداری کن ہچ اس کپک۔ پاکستان مسلم لیگ (ن) نا دور اٹی لاہور تون اوار بڑزکو پنجاب نا علاقہ غاتا شونداری آ چکار کننگا وخت اس کہ ایلو علاقہ غاتے گوجالنگا۔ اوپارے کہ قبائلی علاقہ غاتا شونداری کن زیات آن زیات فنڈ خڑچ کینہ۔ ننا اقتدار اٹ بننگ آن مست غٹ صوبہ غاک این ایف سی ایوارڈ اٹ بیرہ مسہ درسد قبائلی علاقہ غاتا شونداری تننگ نا وعدہ کریسر ولے داسہ صوبہ خیبرپختونخوا آن بیدس ایلو صوبہ غاک وعدہ نا رداٹ فنڈ انا فراوانی کن تیار افس۔ ننا دِین اٹ وعدہ نا پاسداری آ زور شاغنگانے۔ اوپارے کہ غٹ صوبہ غاک پارہ کہ اوفتے زرگزرانی مشکل مون تروک ءِ۔ دا راست ءِ کہ کورونا نا دین انا سوب آن مچ آ ملک ءِ زرگزرانی ویل آتا مون تروک ءِ ولے کوشست کینہ کہ بلوچستان و قبائلی علاقہ غاتے پورو فنڈ فراوان کننگے۔ وزیراعظم پارے کہ پاکستان نا دشمن ہمو مخلوق تون رابطہ ٹی ءِ ہرا قبائلی علاقہ غاتا خیبر پختونخوا ٹی اوار مننگ ءِ خواپسہ۔ او بے چیٹی تالان کننگ نا کوشست کیرہ۔ اوفتے پیشن نا ملک آن فنڈ تننگک۔ عمران خان پارے کہ قبائلی علاقہ غاتا شونداری کن ہرحداسکان کانہ۔ سمگلنگ ملک ءِ بھس کرینے۔ داڑآن صنعت، زرگزران و برآمد آتے نسخان رسینگ انگءِ۔ پاک اوغان سیم آ باڑ خلکونن۔ داڑآن نئے بیرہ اسمگلنگ ءِ توننگ بلکن ملک دشمن زموار آتا ہن و بر ءِ توننگ اٹ کمک رسینگک۔ اوپارے کہ پاک اوغان سیم آ مارکیٹ آتے ملنگ اُن۔ داڑآن مخلوق ءِ روزگار نا وارخواہی دُوبریک۔ اوپارے کہ اوغان طالبان و اوغان حکومت نا نیام اٹ مذاکرات ستاکڑزک۔ نن خوانہ اوغان امن عمل سرسہبی اٹ ہمکنار مرے ولے گڑاس زموار خواپسہ کہ اوغانستان اٹ امن مرے۔ اوغانستان اٹ امن آن نیامی ایشیائی ملک آتون واپاری رابطہ غاتے مون آ دننگک۔ اوپارے کہ بنجائی حکومت قبائلی علاقہ غاتا شونداری کن صوبائی حکومت ءِ ہروڑنا کمک فراوان کیک۔ مستین اٹ دا علاقہ غاتے گوجالنگا ہرافتا سوب آن دا علاقہ غاتا غریبی نا گواچی مسر و روزگار و تعلیم اٹ پدی سلیسر۔ اوپارے کہ دا زیتون نا گچین ءُ پیدواری علاقہ اسے۔ دا علاقہ غاتیٹی زیتون دسنگ نا ڈٹ آہم سجفنگ انگ ءِ۔
