اسلام آباد۔ 28 ستمبر (اے پی پی) وزیراعظم عمران خان دوشنبے نادے آ مہمند، باجوڑو پشاور نا دورہ ءِ کیک ہراڑے او چندی ڈٹ آتا بناء و بنداو ءِ تخک۔ وزیراعظم آفس نا میڈیا ونگ آن جاری بیان نا رداٹ اینو ضلع مہمند اٹ ناحقئی سرنگ و شیخ زید روڈ انا بناءِ کیک و سرکڑدہ غاتیان تران ہم کیک۔ مہمند اٹ دا ڈٹ متحدہ عرب عمارات حکومت نا کمک اٹ دا علاقہ نا الس کن ٹیکی اسے۔ وزیراعظم اوکان پد ضلع باجوڑ نا ہم دورہ ءِ کیک ہراڑے او تیمرگرہ۔خار۔مامدگٹ روڈ انا بنداوءِ تخک و سرکڑدہ غاتیان تران کیک۔ دا ڈٹ آتا سوب آن مہمند و باجوڑ نا الس ءِ ہن و بر، واپار و روزگار نا وارخواہی فراوان مریک۔ داکان بیدس دا ضلع غاتا الس ءِ صوبائی دارالحکومت پشاور و ایلو ضلع غاتون رابطہ ٹی آسانی ودی مریک۔ اوکان پد وزیراعظم عمران خان پشاور نا ہم دورہ ءِ کیک۔ وزیراعظم پشاور اٹ لیڈی ریڈنگ ہسپتال نا سرجیکل و الائیڈ سروسز بلاک نابناءِ کیک۔
