اسلام آباد۔ 25 ستمبر (اے پی پی) بنجائی وزیر سائنس و ٹیکنالوجی چوہدری فواد حسین پارینے کہ بھارت ءِ پاکستانی ہندوبرادری نا یانزدہ بندغ آتا ناحق خون انا ورندی ءِ تروئی مریک۔ پاکستان نا ہندوبرادری، بھیل برادری تون سلوک ءُ۔ بنجائی وزیر جمعہ نا دے آ شاہراہ دستور آ مروک آ پاکستان ہندوکونسل نا برانز اٹ بشخ ہلک۔ فواد چوہدری دا وخت آ میڈیا تون گپ وتران کرسا پارے کہ پاکستان نا ہندوبرادری تون یکجہتی کن داڑے بسونٹ۔ اوپارے کہ جودھ پور اٹ چناتتون اوار 11 کودک پاکستانی تا پراسرار خون مس۔ ہندوخاہوت پاکستان آن ہناسر اوفتا پاکستان آن رشتہ چٹتنے۔ اوپارے کہ داپاکستان نا چناک، پاکستان نا زالبول آک ئسر۔ ہندوستان اٹ ہرا بیدادی مس داڑآ بھارتی حکومت نا سلوک جوان اف۔ چوہدری فواد حسین پارے کہ ہندوخاہوت نا اسہ مسڑ اس پارے کہ پاکستان نا برخلاف بیان تننگ و جاسوسی کننگ آ بیوس کننگا۔ نمن مننگ آ مچ آ خاہوت نا خون ءِ کننگا۔ بنجائی وزیر پارے کہ پاکستان نا شاری تا ناحق خون انا بھارت ءِ دانا ورندی ءِ تروئی مریک۔ اوپارے کہ ہندوستان اٹ مودی ہراوڑحکومت ءِ اسہ فاشسٹ حکومت اسے ٹی بدل کرے پاکستان تون اوار غٹ ہمسایہ غاک دانا گواچی ءُ۔ چین، بنگلہ دیش، نیپال، پاکستان، مودی نا ہندوستان نا شرارت آتیان زہمی ءُ۔ اوپارے کہ پاکستان نا ہندوبرادری، بھیل برادری تون تفوک اُن۔ اقلیتی باسک اسمبلی رمیش کمار پارے کہ ننا ہدف روڈ آتے بند کننگ اف، انڈین ہائی کمیشن نا مون آ دھرنہ تننگ نا ئس۔ بھارت ہندوکمیونٹی ءِ پاکستان نا برخلاف جاسوس کرسا کاریم اٹ اتنگ خواہک ہرا بھارتی جاسوسی آ راضی مفک اودے داوڑ قتل کننگک۔ نن ہندوستان ءِ پاننگ خوانہ کہ نن پاکستانی تینا شاری تا حق اکن جنگ تننگ ءِ چانہ۔
