اسلام آباد۔ 25 ستمبر (اے پی پی) بنجائی وزیر نیشنل فوڈ سیکورٹی ریسرچ سید فخر امام پارینے کہ حکومت پوسکن آ ٹیکنالوجی نا کاریم اٹ اتنگ آن بزغرآتا آسراتی کن ہروڑنا گام گیج کننگ ءِ و ہرچار آ صوبہ غاتا مخ تفی آن بنجائی حکومت زوت خولم نا کم آن کم نہاد نا پڑو ءِ کیک۔ جمعہ نادے آ نجی نیوز چینل تون گپ وتران کرسا اوپارے کہ حکومت کشت وکشار ءِ مون آ دننگ، خولم نا پیدوار ءِ ودفنگ وبزغر آتا مالی حالیت ءِ گچین کننگ کن ہروڑنا گام گیج کننگ ءِ۔ امام کشت وکشار و ایلو بشخ آتیٹی پوسکن ءُ ٹیکنالوجی اس درستی راستی کرفنگ آ زور شاغا۔ اوباوری کرفے کہ پی ٹی آئی نا کماشی ٹی حکومت خولم نا پیداوار ءِ ودفنگ کن چینی بج ریسرچ ٹیکنالوجی آ کاریم کننگ ءِ و حکومت کشارگر آتے چندی فصل آتا پیدوار اٹ ودکی کن پک بیج فراوان کیک۔ اوپارے کہ کشت وکشار نا گچین حکمت عملی تے ہم مون آ دننگک۔ ڈغار و دیر انا بست وبند کون آ باندات آتے ہم اولیتی وڑاٹ ایسر کننگک۔ اوپارے کہ نن خولم نا آب اٹ بیج آتا جاچ ءِ ہلنگ کن کوشست کننگ اُن و دانا پیدوار اٹ ودکی کننگ کن بزغر آتے تننگ نا کوشست کینہ، ساڑی حکومت کشت وکشار نا بشخ انا پائیدار شونداری آ ہم چکار کننگ ءِ و داچرجوئی ٹی کشارگر برادری نا راجی آسراتی کن کیہی گام گیج کرینے۔ سید فخر امام پارے کہ وزیراعظم عمران خان الس کن غذائی رکھ ءِ پک کننگ نا کنڈآ پبی چکار کننگ ءِ۔ اوپارے کہ حکومت و اوڑتون گنڈوک محکمہ غاک ملک اٹ گڑاتا آسانی اٹ فراوانی ءِ پک کننگ کن اسہ ایلو تون کمک کننگ ءُ۔ اوپارے کہ گڑاس زموار بھلو کچ اسے ٹی کوڑی کیرہ ہرانا سوب آن تینا خود آن کاختی ودی کیرہ و نہاد آتیٹی ودکی مریک۔
