اسلام آباد۔ 25 ستمبر (اے پی پی) بھارتی سینئر سفارتکار ءِ دفترخارجہ غا بٹنگسا 24 ستمبر آ کوزہ گر بھارتی فوج انا کنڈآن لین آف کنٹرول (ایل او سی) نا بروح سیکٹر اٹ جنگ بندی نا خارتس خلاف ورزی تیا برانز ریکارڈ کرفنگا۔ بھارتی فوج انا خارتس سم کاری ٹی اِرا بیگناہ شاری ٹھپی مسر۔ جمعہ نادے آ ترجمان دفترخارجہ نا رداٹ سینئر بھارتی سفارتکار ءِ دفترخارجہ غا بٹنگسا برانزی مراسلہ ءِ اونا دوٹی تس و پارے کہ کوزہ گر بھارتی فوج ایل او سی و ورکنگ باؤنڈری نا پدریسہ خلاف ورزی کرسا آرٹلری، بھلو و خودکار سلہہ غاتا کمک اٹ لس شاری آبادی ءِ شست کننگ ءِ۔ بھارتی سفارتکار ءِ پاننگاکہ شاری آبادی ءِ دانستہ وڑاٹ شست کننگ بے کچ است ہسونی، انسانی عظمت و وقار، جہانی انسانی حق و جہانی انسانی کانود آتیان اسُل چپ ءِ۔ بھارت نا کنڈآن جنگ بندی نادا خلاف ورزی تیان علاقائی اممن و سلامتی ءِ بھلو خطرہ اس مون تروک ءِ ہرانا نتیجہ اسٹریٹجک غلطی نا دروشم اس پیش تمنگ کیک۔ بھارت اینخو سال اٹی 2340 وار خارتس جنگ بندی نا خلاف ورزی کرینے ہراٹی 18 بیگناہ شاری شہید و 187 ٹھپی مسنو۔ بھارتی سفارتکار ءِ معلومدار کننگاکہ ایل او سی آ بے چیٹی ٹی ودکی آن بھارت مقبوضہ کشمیر اٹ انسانی حق انا بھلا خلاف ورزی و بیدادی آن جہانی چکار ءِ اسہ کنڈ کننگ کپک۔ بھارت آ زور شاغنگاکہ او اِراہزار مسٹ نا جنگ بندی معاہدہ نا پاسداری ءِ کے، جنگ بندی نا خلاف ورزی نا دا واقعہ غاتا جاست وپاست کرفے۔ بھارتی فوج ءِ جنگ بندی نا شرف ءِ کننگ نا پرمان کے، ایل او سی و ورکنگ باؤنڈری آ اونا رداٹ امن ءِ برقرار تخے و اقوام متحدہ نا سلامتی کونسل نا قرارداد آتارداٹ بھارت اقوام متحدہ نا فوجی مبصر(یواین ایم اوجی آئی پی) ءِ تینا کڑد ءِ ادا کننگ نا موکل ایتے۔
