اسلام آباد۔ 25 ستمبر (اے پی پی) بنجائی وزیر دفاعی پیداوار زبیدہ جلال تون عراق نا سفیر حامد عباس لافتا وزارت دفاعی پیداوار اٹ اوڑدہی کرے۔ بنجائی وزیر شرفمند آ مہمان ءِ بخیر کرسا عراقی الس کن پاکستان نا کنڈآن امن وشونہالی نا نیک است خواہی تا درشانی ءِ کرے۔ بنجائی وزیر دفاعی پیداوار سفیر ءِ معلومدار کرے کہ دفاعی پیداوار نا پڑاٹ تین پہ تینی آزموندہ غاتا شریداری اٹ ہڑتوم آ ملک آتا نیام اٹ دفاعی کمکاری ءِ پین ودفنگ مریک۔ بنجائی وزیر علاقائی سلامتی کن سوگو عنصر نا وڑاٹ پاکستان نا اہم کڑد ءِ ہم مون آ تخا۔ اوپارے کہ ڈیہہ ٹی پائیدار امن و سوگوی کن علاقائی کمک المی ءِ۔ عراقی سفیر علاقائی امن و سوگوی کن پاکستان نا کوشست آتا ستاءِ کرسا پارے کہ عراقی حکومت و الس ءِ پاکستان و اونا الس آ پت ءِ و تین پہ تین ہڑتوم آ کنڈآتا تعلقداری تے پین مون آ دننگ کن اواری اٹ کاریم کرسا کیرہ۔
