اسلام آباد۔ 25 ستمبر (اے پی پی) بنجائی وزیر بحری امور سید علی حیدر زیدی سی فیئررز کن گورنمنٹ شپنگ آفس نا آن لائن پورٹل نا بناءِ کرینے۔ تاریخ اٹ اولیکو وار پورٹس اینڈ شپنگ ڈویژن نا ویب سائٹ نا ہم بناءِ کننگانے۔ بناءِ کننگ نا وخت آ گپ وتران کرسا بنجائی وزیر علی زیدی پارے کہ آن لائن پورٹل اٹ سی فیئررز نا بابت غٹ ڈیٹا ڈیجیٹل دروشم اٹ ساڑی و رکھ مریک۔ سی فیئررز نا درج انا آسانی، میننگ ایجنٹس نا بابت معلومداری آن لائن پورٹل اٹ ساڑی مریک، آن لائن پورٹل آن سی فیئررز ءِ سی فیئرز شناختی کارڈ جوڑ کننگ اٹ آسانی مریک، سی فیئررز پورٹل نا کمک اٹ سروس بک، و ویزاجاری ہم کرفنگ کیرہ۔ علی زیدی پارے کہ داکان مست مچ آ ملک آن سی فیئرز ءِ معلومداری تا درج، ویزا و کارڈ اکن کراچی بروئی تماکہ۔ سی فیئررز ءِ داکان مست کاغدی کارروائی تیٹی بھاز مشکل آتون مون تروک ئس، ای پورٹل نا کمک اٹ سی فیئرز نا درج و پک کننگ نا عمل شفافیت اٹ مننگ کیک، علی زیدی نا مستی پاننگ ءس کہ درملکی ویزہ کن ہم معلومداری بیرہ اسہ کلک اٹ ملک و سی فیئررز ءِ ویزہ نا جاری کننگ اٹ ہرامشکل مون تروک ئس اوٹی کمتی بریک۔ پورٹل ویب سائٹ وزیراعظم عمران خان نا ڈیجیٹل پاکستان نا وژن نا عملی دروشم ءِ۔ پورٹل ءِ کاریم اٹ اتنگ نا وڑوڈول نا بابت ٹیوٹر ریل وڈیو ہم اوڑتون اوار جاری کننگانے۔
