بھارتی اُرد آں پہ زور ءُ زانت مزنیں وتاس آنی نشانگ شہر آباتی آناں نشانگ بستگ، بھارتی کور ءُ کائی تیر گواری ءِ واکیہ ءَ گوزوکیں سال 18 شہری شہید، 185 شہری ٹپیگ بوتگ انت
اسلام آباد ۔ 24 ستمبر (اے پی پی) سلاھ بندیں ارد ءِ ترجمان میجر جنرل بابر افتخار ءَ ایل او سی ءِ جوڑا سیکٹر ءَ پاکستان ءَ پوسٹیں جتا جتائیں ملک آنی سفارتکار، دیمپانی اتاشی ءُ میاں اوستمانی ادارگ آنی نماھند آناں بریفنگ دیان ءَ گوشت کہ گوزوکیں سال بھارت ءِ نیمگ ءَ 2333 رند ءَ لائن آف کنٹرول ءِ سر ءَ جنگ بندی ءِ منوگری کنگ بوتگ، بھارتی کور ءُ کارئی تیر گواری ءِ واکیہ ءَ گوزوکیں سال 18 شہیر شہید بوتگ انت ءُ 185 شہر ٹپیگ بوتگ انت۔ آئی ءَ گوشت کہ بھارتی اُرد زور پہ زوت ٹوھ ٹوھیں وتاس آں گوں شہیر آباتی آناں نشانگ بندگ ءَ انت۔ ڈی جی آئی ایس پی آر ءَ گوشت کہ بھارت ءِ نیمگ ءَ شہری آباتی آناں نشانگ بندگ میاں اوستمانی کانود آنی ھلاپ انت۔ آئی ءَ گوشت کہ کزبی کار ءِ ارد بوھگ ءِ بستا ءَ پاک آرمی ءِ نیمگ ءَ ایوک ءَ اردی چوکی آناں نشانگ بندگ بوتگ۔ ڈی جی آئی ایس پی آر ءَ گوشت کہ بھارت کور ءُ کارئی تیر گواری ءَ را گیش کنگ ءِ وااستہ شہری آباتی آناں کور ءُ کارئی تیر گواری ءُ نشانگ بندگ بوھگ ءَ انت۔ آئی ءَ گوشت کہ بھارت اے وڑ مقبوضہ کشمیر ءَ میاں اوستمانی دلگوش ءَ دور کنگ ءِ واستہ چو کنگ ءَ انت۔ میجر جنرل بابر افتخار ءَ گیش تران کت ءُ گوشت کہ بھارت مقبوضہ کشمیر ءَ بنی آدمی ھک آناں سک باز لگت مالی ءَ کنگ ءَ انت۔ بھارت ءَ 2014 ءَ ایل او سی ءِ سر ئَ جنگ بندی ءِ ھلاپ ءِ کار گیش بوتگ انت۔ بھارت ءَ 30 ءُ 31 جولائی ءَ نیلم ویلی ءَ کودکیں شہری آنی سر ءَ کلسٹر ایمونیشن کارمردم کتگ۔ میاں اوستمانی ادارگ ھاسیں رنگ ءَ یو این ایچ آر وتی جتا جتائیں رپوٹ آنی تہ ءَ بھارتی زوراکی ءَ را سہرا کتگ۔ میجر جنرل بابر افتخار ءَ گوشت کہ کشمیر ءِ جیڈھ یونائیٹڈ نیشن ءِ منوگری ءِ رد ءَ گیواری بوھگ سک ضلوری انت۔ سفارتکار آنی ڈل لائن آف کنٹرول ءِ سر ءَ بھارتی اُرد آنی نیمگ ءَ جنگ بندی ءِ منوگری ءِ ھلاپ ءَ وت چار ءُ تپاسی گپتگ۔ ڈل ءَ آماچیں مردم آنی آنی گوما گند ءُ نند ھم کتگ۔ پاکستان ءَ یونائیٹڈ نیشن ءِ پاکستان ءُ بھارت ءِ واستہ اُردی گشتانکار، میاں اوستمانی میڈیا ءُ سفارتکار آنی لائن آف کنٹرول ءِ کجاھم ھم دمگ ءِ تر ءُ تاب ءَ را مدام وش اتک کنت۔ ایشاناں آباتی ءَ تاں روگ ءُ جست ءُ پرس ءِ واستہ موہ دنت تانکہ آ گوں نزیکی ءَ چار ءُ بچار بکن انت۔ وھدیکہ بھارت اے وڑؑ نہ کنت۔ یونائیٹڈ نیشن ءِ اردی گشتانکار آناں اچبر بھارت ءَ موہ نہ داتگ۔ بھارت ءَ اھوالکار ءُ میاں اوستمانی میڈیا ءِ باسک آناں کشمیر ءِ جاور ھال آنی کوریج کنگ ءِ دزگیر کتگ۔ ڈل ءِ تہ ءَ آذربائیجان، بوسنیا ءُ ہرزیگوینا، یورپی یونین، پرتگال، سعودی عرب، زّرباری افریقہ، ترکی، یونان، آسٹریلیا، ایران، عراق، برطانیہ ، پولینڈ، ازبکستان، جرمنی ءِ سفارتکار ءُ نماھند ھوار انت۔ سوئٹزرلینڈ، فرانس، مصر، لیبیا، یمن ءُ اوگانستان ءِ سفارتکار وھدیکہ یونائیٹڈ نیشن ءِ چیر دستیں ورلڈ فوڈ پروگرام ءِ نماھندگ ھم ایل او سی ءِ تر ءُ تاب ءَ کنگ ءَ انت۔
