اسلام آباد۔ 24 ستمبر (اے پی پی) بلوچستان حکومت صوبہ ٹی زالبول آتا حق انا رکھ و راجی رکھ آن بیدس زالبول آتے واکدار جوڑ کننگ کن اسہ جامع پروگرام اس بناکرینے۔ بلوچستان حکومت نا سرکاری حوالی بلوچستان حکومت نا اِراسال انا کارکڑد انا پارے کہ صوبائی حکومت زالبول آتیکن کاروبار نا وارخواہی ودی کننگ و اوفتیکن اسہ پلیٹ فارم اسے نا وڑاٹ کوئٹہ ٹی اولیکو وار زالبول بازار اس جوڑ کننگ نا ڈٹ اس کرینے۔ عہدیدار پارے کہ بلوچستان حکومت تدوک آ سال انا بجٹ اٹ چندی ڈٹ آتا جوڑ کننگ کن زالبول آتے واکدار کننگ و صوبہ نا شونداری کن تینا کڑد ءِ ادا کننگ نا قابل زالبول آتے آسراتی فراوان کننگ کن 1.872 ارب روپئی جتا کریسس۔ اومستی پارے کہ دا پروگرام نا رداٹ صوبہ نا ہر ڈویژنل ہیڈکوارٹر اٹی ہاسٹل جوڑ کننگ کن 600 ملین روپئی تخنگانے تانکہ ملازمت پیشہ زالبول ءِ رکھ ہنکین فراوان کننگ مرے۔ عہدیدار پارے کہ حکومت کوئٹہ ٹی ویمن بزنس انکیوبیشن سینٹر نا تفنگ نا بناءِ ہم کیک ہرانا مسخت زالبول ءِ تیناکاروبار اس کننگ، اوفتا کاروباری لائخی تے ودفنگ ومارکیٹ اٹ اوفتے مون تروک چیلنج آتا مون ءِ توننگ اٹ کمک فراوان کننگ ناءِ۔ حکومت پین زالبول کاروباری بندغ آتے داکاروباری سرگرمی ٹی بشخ ہلنگ نا ترغیب تننگ کن ہیلکاری پروگرام نا ہم بناءِ کرینے۔ اوپارے کہ ہیلکاری سیشن تیان ورناتے ساڑی کاروباری ماحول اٹ جاگہ ودی کننگ اٹ کمک رسینگک۔ اوپارے کہ حکومت زالبول آتے مالی وڑاٹ واکدار کننگ و اوفتے خودکفیل کننگ کن زالبول آتیٹی انڈومنٹ فنڈ درستی راستی کرفنگ ءِ۔ اوپارے کہ حکومت کوئٹہ ٹی زالبول نظامت نا شونداری کاریم تیٹی ترندی ایسونے۔ اومستی پارے کہ بحیثیت قوم نن ہمووخت اسکان سرسہب مننگ کپنہ ہراتم اسکان زالبول آتے واکدار کپنہ۔ اومستی پارے کہ زالبول آتے واکدار کننگ کن گچین کانودسازی کننگ انگ ءِ و میرات اٹ زالبول آتے بشخ تننگ کن میرات نا بل مہالو آن اسمبلی آن پاس کننگانے۔ عہدیدار پارے کہ داہیت اسل پیدوار ءِ کہ زرگزرانی و راجی گام گیج آک صنعی امتیاز نا چٹفنگ کن پیش رفت ءِ گچین کننگ اٹ کمک فراوان کرینو۔ اومستی پارے کہ اسہ ملک اس ہم تینا زالبول آتے واکدار کننگ آن بیدس شون ہلنگ کپک۔
