اسلام آباد۔ 24 ستمبر (اے پی پی) کشمیر انٹرنیشنل انسٹیٹیوٹ آف انٹرنیشنل ریلیشنز(آئی آئی آر) نا چیئرمین الطاف حسین وانی ترک صدر رجب طیب اردوان نا کشمیری تا روا مسخت نا مخ تفی ءِ کننگ آ اونا ستاءِ کرسا جہانی راہشون تیا زور شاغانے کہ او کشمیری تا حق اکن تینا توار ءِ بڑز کرسا بھارت آ زور شاغے کہ او کشمیر نا ویل ءِ کشمیری تا است خواہی تا رداٹ ایسر کے۔ پنچ شنبے نادے آ داڑے جاری اسہ بیان اسے ٹی آئی آئی آر نا سروک ترک صدر نا منت واری ءِ ہرفسا پارے کہ بھارتی ظلم و جور اٹ اختہ کشمیری الس ترک صدر نا بھاز منت وار ءُ کہ او مدام کشمیری تا روا جہد و کشمیر نا جھیڑہ نا پرامن ایسری نا مخ تفی ءِ کرینے۔ اوپارے کہ ترکی ہمو ملک آتیٹی اوار ءِ ہرافک ہر جہانی فورم آ کشمیر نا ویل ءِ ہرفنگ آن بیدس بھارت نا غیر کانودی کوزہ و بھارتی فوج انا کشمیری الس آ کروک آ ظلم انا ترندی اٹ مذمت ءِ کرینو۔ صدر اردگان نا تاریخی تقریر نا ذکر ءِ کرسا اوپارے کہ اونا بیان آن کشمیری الس ہرا بدترین وڑنا بھارتی ریاستی دہشت گردی نا گواچی ءُ ٹی اومیت نا اسہ پوسکن ءُ لہر اس ودی مسنے۔ اوڈیہہ ٹی سیاسی و انسانی حق انا بھلا حالیت آتا حوالہ ءِ ترسا پارے کہ داسہ وخت بسنے کہ بااثر جہانی راہشونک داحقیقت نا ادراک کیر کہ کشمیری السءِ مون نا کماشی ٹی فاشٹ حکومت نا رحم و کرم آ ہلنگ مفک ہرا کشمیر نا راجی و سیاسی و دودوربیدہ ئی شناخت ءِ چٹفنگ اٹ لگوک ءِ۔ وانی پارے کہ کشمیر نا ویل تون مون تننگ کن اہم اسٹیک ہولڈر آتا نیام اٹ بھرمی مذاکرات اسٹ انگا کسر ءِ ولے ویل انا ایسری کن بیرہ ہڑتوم آ کنڈآتا مذاکراتی عمل آ سیبو کننگ کشمیر اٹ پین خونریزی و ہلاکت آتا موکل تننگ آنبار مریک۔ اوپارے کہ دنیا جھیڑہ نا ایسری ءِ پٹنگ کن شاہد غیر معینہ مد انا انتظار ءِ کننگ کیک ولے کشمیری ہراہڑدے قتل مننگ ءُ او اسہ دے اس ہم انتظار کننگ کپسہ ہنداخاطرآن المی ءِ جہانی راہشونک بھلو کچ اسے آ مون آ بریرو دا مہلک جھیڑہ ءِ مدامی کن ایسر کننگ کن غٹ دوئی آپشن تے کاریم اٹ اتیر۔ اوپارے کہ بھارت، پاکستان و کشمیری تے مذاکرات نا میز آ اتنگ کن جہانی واک آتا آخبت و مربوط سفارتی اثرورسوخ مننگ المیءِ۔
