اسلام آباد۔ 24 ستمبر (اے پی پی) قومی ایئر لائن (پی آئی اے) نا ترجمان عبداللہ خان پارینے کہ وزیراعظم عمران خان نا خصوصی کوشست آتیان پی آئی اے ءِ سعودی عرب کن 21 پین جہاز آتا خصوصی موکل نامہ ملانے۔ ترجمان نا کنڈآن پنچ شنبے نادے آ جاری اعلامیہ نا رداٹ تدوک آ نن پی آئی اے نا چیف ایگزیکٹو آفیسر ایئر مارشل ارشد ملک وعزیراعظم آن مخلوق نا فریشانی و بے پناہ رش ءِ ایسر کننگ کن کڑد ادا کننگ نا خواست کریسن۔ بڑزکو کہولی سفارتی ذرائع کاریم اٹ اتنگ آن پد بیرہ پی آئی اے ءِ خصوصی وڑاٹ پین جہاز جاری کننگ نا پروانہ جاری کننگانے۔ ترجمان پارے کہ زیات تر اقامہ ہرا 30 ستمبر آ مد ءِ پورو کننگ ءُ نا سوب آن پی آئی اے نا دفتر و ایجنٹ آتون بھلو رش اس مسوسس۔ گڑاس زموار موقع غان فائدہ ہرفسا کیہی گناکبین ٹکٹ بہاکننگ نا بناءِ کریسر۔ ترجمان پارے کہ سی ای او پی آئی اے باندات نا نوٹس ءِ ہلسا اصل کرایہ غاتے شینک کرے و پین جہاز آتا موکل طلب کریسس۔ پی آئی اے نا ہفتہ وار 23 جہاز پاکستان نا چندی شار تیان سعودی عرب آ روانہ مننگ ءُ ہرافتے ٹی گنجائش 12000بندغ آتا ءِ۔ ترجمان پارے کہ 13 پین جہاز راجی فاصلہ نا کانود اٹ آپریٹ کننگ آن پین 3500 نا گنجائش ودی مس ہراخواست آن بھاز کم ئسر۔ وزیراعظم نا نیام تمنگ تون 21 پین جہاز آتا سسٹم اٹ بننگ آن پد پی آئی اے نا لائخی 25،500 بندغ آتا مسنے۔ ترجمان پارے کہ دا غٹ بندغ آک 30 ستمبر آن مست سعودی عرب آ روانہ مریرہ۔ ترجمان پارے کہ اکتوبر نا تُواکن پی آئی اے مہالو آن تینا جہاز آتے اِرا ہنداخہ کننگ کن سعودی کمامدار آتیان درخواست کرینے۔ ترجمان نا رداٹ پی آئی اے نا چیف ایگزیکٹو آفیسر ایئرمارشل ارشد ملک پارے کہ پی آئی اے صدر و وزیراعظم پاکستان، وزیر ہوابازی، وزیر خارجہ و سیکرٹری خارجہ نا خصوصی منت وار ءِ۔ اومستی پارے کہ پی آئی اے وزارت خارجہ تون گپ وتران کننگ ءِ کہ اقامہ نا مد اٹ ودکی کن ہم سعودی کمامدار آتون ہیت کے۔ ایئرمارشل ارشد ملک ہر مشکل ساہت اٹ پی آئی اے قوم اتون ہم کوپہ سلک۔
