وزیراعظم عمران خان اقوام متحدہ نا فورم آ جہانی برادری نا چکارءِ بھارت نا غیر کانودی کوزہ گیر جموں و کشمیر اٹ برجا انسانی حق انا بھلا خلاف ورزی تا کنڈآ کرفک، وزیر خارجہ شاہ محمود قریشی

اسلام آباد۔ 24 ستمبر (اے پی پی) وزیر خارجہ مخدوم شاہ محمود قریشی پارینے کہ جہانی برادری ءِ کشمیر نا ویل ءِ سنجیدگی اٹ ہلوئی مریک، اگہ اِرا ایٹمی قوت آتا نیام اٹ بے چیٹی ودک تو او مچ آ ڈیہہ نا امن و سوگوی کن خطرہ نا سوب مننگ کیک۔ پنچ شنبے نادے آ تینا اسہ بیان اسے ٹی وزیر خارجہ پارے کہ بھارت نا غیر کانودی کوزہ گیری ٹی جموں و کشمیر نا حالیت آک بھاز خراب ءُ و داٹی پدریسہ ودکی مننگ ءِ۔ نن ترک صدر رجب طیب اردگان نا منت وار اُن کہ او اقوام متحدہ کون آ جہانی فورم آ کشمیر نا ویل انا ذکر ءِ کرے۔ اوپارے کہ جہانی برادری ءِ کشمیر نا ویل ءِ سنجیدگی اٹ ہلوئی مریک انتئے کہ اگہ اِرا ایٹمی قوت آتا نیام اٹ بے چیٹی ودک تو او مچ آ ڈیہہ نا امن و سوگوی نا خطرہ غاتا سوب مننگ کیک۔ وزیراعظم عمران خان تدوک آ سال آنبار داوار آ ہم اقوام متحدہ نا اہم فورم آ کشمیر نا ویل ءِ چست کیک و جہانی برادری نا چکار ءِ بھارت نا غیر کانودی کوزہ گیر جموں و کشمیر اٹ برجا انسانی حق انا بھلا خلاف ورزی تا کنڈآ کرفک۔ ننا خواست ءِ کہ بھارت نا غیر کانودی کوزہ گیری ٹی کشمیر اٹی برجا پابندی تے دمدستی ہرفنگے۔ ہموڑے برجا کمیونیکیشن بلیک آؤٹ ءِ دمدستی وڑاٹ چٹفنگے و بھارت سرکار بھارت نا غیر کانودی کوزہ گیری ٹی جموں و کشمیر اٹی غیرآئینی وڑاٹ، آبادیاتی تناسب ءِ بدل کننگ کن ہرا ڈومیسائل کانود اٹ ترمیم کرینے اودے دمدستی وڑاٹ پدی کننگے۔ وزیر خارجہ پارے کہ بھارت ہراتم تہہ نا زور انا گواچی مریک یا کشمیر اٹ حالیت آک اونا وس آن پیش مریرہ تو او چکار ءِ اسہ کنڈ کننگ کن لین آف کنٹرول نا خلاف ورزی تا بناءِ کیک۔ داوخت آ بھارت اٹی کورونا دین ترندی اٹ تالان مننگ ءِ ہڑدے 1100 نا لگ بھگ مخلوق زوال کننگ ءُ دا بے ڈولی آن چکار ءِ اسہ کنڈ کننگ کن بھارت لین آف کنٹرول نا خلاف ورزی تا کمک اٹ شاری آبادی تے شست کننگ ءِ۔ اوپارے کہ ای ماسکو ٹی شنگھائی کمکار تنظیم نا وزرائے خارجہ کونسل نا دیوان نا وخت آ چندی وزیر خارجہ غاتون تینا ہڑتوم آکنڈآتا اوڑدہی تیٹی دا مچ آ حالیت آتا سرجم ذکر ءِ کریٹ و اوفتا چکار ءِ دانازرک حالیت آتا کنڈآ کرفیٹ۔ جہانی برادری دا مچ آ حالیت آتا دمدستی نوٹس ءِ ہلے۔