اسلام آباد۔ 24 ستمبر (اے پی پی) اسپیکر قومی اسمبلی اسد قیصر پارینے کہ پاکستان و اوغانستان نا نیام اٹ تعلقداری مذہب، اخوت، دودوربیدہ و ہمسائیگی نا سوگو بنداوآتیاٹی ءِ، سیم انا ہڑتوم آ کنڈآتا الس نا نیام اٹ مہرومریبت و تین پہ تینی شرف نا رشتہ ءِ۔ پاکستان اسہ پرامن، سوگو و شونہال اوغانستان اس ہُننگ نا خواہندار ءِ۔ پارلیمانی سفارتکاری نا کمک اٹ پاکستان و اوغانستان نا نیام اٹ تین پہ تینی تعلقداری ءِ مون آ دننگ اٹ کمک رسینگک۔ پاکستان، اوغانستان تون زرگزرانی، اقتصادی و علاقائی شونداری کن کمکاری ءِ پین مون آ دننگ خواہک۔ داخیال آتا درشانی ءِ او اوغانستان نا قائم مقام سفیر رحیم اللہ قطرہ تون گپ وتران کرسا کرے ہرافک پنچ شنبے نا دے آ داڑے اوڑتون اوڑدہی کرے۔ اوڑدہی ٹی ہڑتوم آ کنڈآتا تعلقداری، ڈیہہ ٹی امن و ایمنی نا حالیت و تین پہ تینی است خواہی نا ایلو باندات آ گپ وتران کننگا و ہڑتوم آ راہشونک پارلیمان نا قائمہ کمیٹی نا نیام اٹ رابطہ جوڑ کننگ آ امنا کریر۔ اسپیکر قومی اسمبلی پارے کہ پاکستان و اوغانستان نا نیام اٹ تعلقداری مذہب، اخوت، دودوربیدہ و ہمسائیگی نا سوگو بنداو تیا استوار ءُ۔ سیم انا ہڑتوم آ کنڈآتا الس نا نیام اٹ مہر و مریبت و تین پہ تینی شرف نا رشتہ ءِ۔ اوپارے کہ پاکستان اسہ پرامن، سوگو و شونہال اوغانستان اس ہُننگ نا خواہندار ءِ۔ پارلیمانی سفارتکاری نا کمک اٹ پاکستان و اوغانستان نا نیام اٹ تین پہ تینی تعلقداری ءِ مون آ دننگ اٹ کمک رسینگک۔ اوپارے کہ پاکستان، اوغانستان تون زرگزرانی، اقتصادی و علاقائی شونداری کن اواری اٹ کاریم کننگ خواہک ۔ اوغان امن معاہدہ اوغانستان و ڈیہہ ٹی امن و شونداری ٹی اسہ اہم ءُ مزل اسے نا حیثیت تخک۔ اوڑدہی ٹی اوغان سفیر رحیم اللہ قطرہ پارے کہ اوغانستان پاکستان تون تینا خڑکی دوستانہ تعلقداری ءِ بھاز اہمیت ایتک۔ اوغانستان ڈیہہ ٹی امن کن پاکستان نا کوشست آتے قدر انا نظر اٹ ہرک ۔ اوپارے کہ اوغانستان پاکستان تون اقتصادی و واپاری بشخ آتیٹی کمکاری ءِ مون آ دننگ نا خواہندار ءِ۔ اوغانی الس پاکستانی الس تون مہرومریبت و خیرخواہی نا جوزہ تخک۔، ہڑتوم آ ملک آتا نیام اٹ واپار نا گچین وارخواہی ارے ہرافتیان فائدہ ہرفنگ انگ ءِ۔ رحیم اللہ قطرہ پارے کہ ہڑتوم آ ملک آتا نیام اٹ تعلقداری تے پین سوگو کننگ اٹ پارلیمان اہم کڑد ادا کننگ کیک۔ قائم مقام اوغان سفیر رحیم اللہ قطرہ اوغان واپار نا کسر اٹ بروک آ اڑاند آتے مر کننگ اٹ اسپیکر قومی اسمبلی نا کڑد انا ستاءِ کرے۔
