اسلام آباد۔ 24 ستمبر (اے پی پی) بنجائی وزیر پٹرولیم عمر ایوب خان و وزیراعظم نا خصوصی کمکار پٹرولیم ندیم بابر ئسک پارینو کہ گیس انا بشخ انا گردشی وامک 250 ارب روپئی اسکان سرمسنو۔ یخ آتیٹی ایس ایس جی سی نا سسٹم اٹ گیس انا کاختی 400 ایم ایم سی ایف ڈی و ایس این جی پی ایل نا سسٹم اٹ 300 ایم ایم سی ایف ڈی مننگ نا گمان ءِ، (ن) لیگ و پیپلزپارٹی تیل وگیس انا کوڑی تا خننگ کن گام گیج کتوس، ملک اٹ تیل و گیس انا کوڑیک 7.5 درسد نا حساب اٹ کم مننگ ءُ۔ سندھ حکومت گیس پیپ لین کن 17 کلومیٹر نا کسر کن داتم اسکان موکل تتنے، گیس پیپ لین کن زوت کسر ملتو تو حالیت آک خراب مننگ کیرہ، 17 کلومیٹر پیپ لین آن ودکی 150 ایم ایم سی ایف ڈی گیس فراوان کننگ مریک، گیس ناکاختی نا مون ءِ توننگ کن ایل این جی درآمد کروئی تمک۔ اوداخیال آتا درشانی ءِ پنچ شنبے نادے آ پریس کانفرنس آن تران کرسا کرے۔ بنجائی پٹرولیم عمر ایوب خان پارے کہ (ن) لیگ و پیپلزپارٹی تیل وگیس اناکوڑی تا خننگ کن گام گیج کتوس، پاکستان نا تیل وگیس انا کوڑی 7.5 درسد نا حساب آن کم مرسا کرے، سندھ خاص کر کراچی ٹی گیس انا کاختی نا مون تروک ءِ، گیس پیپ لین کن 17 کلومیٹر نا کسر نا سندھ حکومت داتم اسکان موکل تتنے۔ گیس انا بشخ اٹی گردشی وامک 250 ارب روپئی آ ن گدرینگانے، ملک اٹی گیس انا کمتی ءِ ہرادے پورو کننگ کن پیشن آن گیس درآمد کروئی تمک، یخ آتیٹی گیس انا کاختی نا بابت پیشگی گام گیج کننگ ءِ۔ اوپارے کہ اگہ سندھ حکومت 17 کلومیٹر مریس پیپ لین شاغنگ کن کسر فراوان کے تو نن دمدستی وڑاٹ داپیپ لین تے شاغنہ، داڑآن 150 ایم ایم سی ایف ڈی گیس سسٹم اٹ بریک، ملک اٹی گیس انا کاختی مننگ ءِ و ننے گیس درآمد کروئی تمک، یخ آتیکن ننے گیس انا ڈٹ بندی ءِ کروئی تمک و داڑکن ننے سی این جی و ایلو چندی بشخ آتا گیس ءِ بندکروئی تمنگ کیک۔ اوپارے کہ حکومت سندھ آن ہریفنگے کہ او راہداری انت اکن تفننگ ءِ، یخ آتیٹی گیس انا خواست ودک، ویٹیج ایوریج آ گیس انا نہاد نا تعین ءِ کننگپک تو دا ویل مرسا کیک و گیس انا کاختی مریک، و گیس انا کاختی مریک، نن دا باندات آ اسہ گیس کانفرنس اسے نا ہم بست وبند کرے و دانا ایسری کن کوشست کننگ انگ ءِ۔ وزیراعظم ناخصوصی کمکار پٹرولیم ندیم بابر پارے کہ سندھ و خاص کر کراچی ٹی گیس انا پریشر کم ءِ، خدونا سال ایس ایس جی سی ناسسٹم اٹی 1120 آن 1150 ایم ایم سی ایف ڈی گیس بسکہ ہرا داسہ 960 آن 970 ایم ایم سی ایف ڈی آ بسنے۔
