لاہور۔ 24 ستمبر (اے پی پی) وزیراعلیٰ پنجاب سردار عثمان بزدار تون وزیراعلیٰ آفس اٹ چائنہ پاکستان اکنامک کوریڈور اتھارٹی نا چیئرمین لیفٹیننٹ جنرل (ر) عاصم سلیم باجوہ اوڑدہی کرے۔ ہراٹی پنجاب اٹی سی پیک نا رداٹ برجا ڈٹ آتیا پیش رفت آ سرجم گپ وتران مس و پنجاب اٹی سی پیک پروجیکٹ آتیا کاریم نا رفتار ءِ ترند کننگ آامنا کننگا۔ اوڑدہی ٹی کشت وکشار نا بشخ انا پائیدار شونداری نا بابت ہم گپ وتران کننگا و داہیت آامنا کننگاکہ کشاری بشخ انا مون آ دننگ کن ریسرچ آ پین فوکس کننگک۔ اوڑدہی ٹی فصل آتا پیدوار اٹ ودکی کن پوسکن ءُ بج درستی راستی کرفنگ نا گرج آ زور شاغنگا۔ وزیراعلیٰ داوخت آ گپ وتران کرسا پارے کہ وزیراعظم عمران خان نا ویژن نا رداٹ سی پیک ڈٹ آتیا اولیتی بنداو تیا کاریم برجاءِ۔ پنجاب اٹی سی پیک پروجیکٹ آتے شفافیت و ترند رفتاری اٹ پورو کننگ انگ ءِ۔ سی پیک پروجیکٹ آتا پوروی آن زرگزران جوان مریک۔ لاہور اٹ اورنج لائن میٹرو ٹرین نا ٹیسٹ رن پورو مسنے و اورنج لین میٹرو ٹرین بروک آ تُو انا ایسر اسکان چلیفنگ نا ارادہ ءِ۔ دارداٹ پنجاب ماس ٹرانزٹ اتھارٹی ءِ المی پارت کرینے۔ اورنج لائن میٹروٹرین نا روٹ آ شجرکاری و بیوٹی فکیشن کننگ انگ ءِ۔ چیئرمین سی پیک اتھارٹی لیفٹیننٹ جنرل (ر) عاصم سلیم باجوہ پارے کہ سی پیک ڈٹ پاکستان کن المی اہمیت تخک۔ سی پیک پروجیکٹ ترندی اٹ پوروی نا کنڈآ ہِننگ ءِ۔ پنجاب اٹ سی پیک پروجیکٹ آتا حالیت آتیا پیش رفت است جم ءِ۔ اوپارے کہ پنجاب اٹ کشاری بشخ اٹ بے پناہ پوٹینشل ءِ۔
