اسلام آباد۔ 24 ستمبر (اے پی پی) وزیراعظم عمران خان پارینے کہ نیزگار ملک آتا جہانی استحصال ءِ بند کننگے، ساڑی آ جہانی نظام اٹ سرمایہ نا سہی بشخپننگ بھلو ویل اسے، دنیا ٹی ودوک آ نیزگاری آن جہانی امن ءِ بھاز خطرہ مون تروک ءِ، کوویڈ۔ 19 اٹی پاکستان سمارٹ لاک ڈاؤن نا پالیسی آ عمل کرسا دانا مون ءِ تورین، احساس پروگرام پاکستان نا تاریخ نا نیزگاری نا چٹفنگ نا غٹ آن بھلا پروگرامءِ۔ پنچ شنبے نادے آ اقوام متحدہ ناجنرل اسمبلی نا دیوان نا وخت آ بڑزکو کہول نا نیزگاری نا چٹفنگ نا بابت فورم آن تران کرسا وزیراعظم عمران خان پارے کہ کورونا نا دین انا سوب آن اقتصادی شرح نمو ٹی ترندی اٹ کمتی مس، حکومت پاکستان احساس پروگرام اٹ یک ونیم کروڑ خاہوت آتا مالی کمکءِ کرے، حکومت کورونا نا دین آن نیزگار آتے بچفنگ کن چندی گام گیج کرے، دنیا نا 26 ہزگار انگا بندغ آتا دوتیٹی زیات تر دولت مرکوز ءِ۔ وزیراعظم پارے کہ دنیانا آبادی نا 15 درسد ہراکہ کم و ود اسہ ارب مریرہ او غریبی اٹ رہینگ انگ ءُ، کٹیا و لائخی تیٹی کمتی نا سوب آن او عزت اٹ رہینگ انگ آن قاصر ءُ، نیزگاری نا سوب آن بھلو کچ اسے ٹی انسانک زہمی مننگ ءُ، دا انسانی حق انا خلاف ورزی ءِ دا راجی و اقتصادی نزوری نا ہم اسہ سوب اسے و دانا سوب آن دنیا ٹی بھلا سیاسی و سلامتی نا ویل آک ودی مننگ ءُ۔ وزیراعظم پارے کہ داڑکن المی ءِ کہ اقوام متحدہ نا پائیدار شونداری نا ہدف آتیٹی اولیکو اولیت نیزگاری نا چٹفنگ مرے۔ وزیراعظم پارے کہ تدوک آ 30 سال آن نیزگاری ٹی نمان کمتی بسنے ولے کوویڈ۔ 19 نا دین انا سوب آن جہانی کسادبازاری دا صدی نا بدترین کچ آٹے، 10 کروڑ بندغ بے کچ غریب مسر ہرافتے پدی اتنگ کن کیہی دہائی درکار مریک، کوویڈ۔ 19 دین ہچ ءُ پرخ اس کتو ولے نیزگار و محروم بندغ آک داڑآن بھاز زیات زہمی مسر۔وزیراعظم پارے کہ پاکستان اٹ سمارٹ لاک ڈاؤن پالیسی نا کمک اٹ نن دانا مون ءِ توننگ نا قابل مسن، کنا حکومت نیزگار و محروم مخلوق ءِ رکھ تس، ننامالی مشکل آتیان پد ہم نن ایمرجنسی کیش انا رداٹ اسہ ارب 25 کروڑ ڈالرنا پیکج تسن ہراڑآن اسہ کروڑ 50 لکھ خاہوت و 10 کروڑ بندغ فائدہ ہرفیر۔ وزیراعظم پارے کہ اوناحکومت نیزگاری نا چٹفنگ نا کثیر الشعبہ پروگرام آ عمل کننگ ءِ، احساس پاکستان نا تاریخ نا نیزگاری نا چٹفنگ نا غٹ آن بھلا پروگرام ءِ۔ اوپارے کہ ننا حکومت 2023ء اسکان نیزگاری نا ساڑی آ 24.3 درسد کچ ءِ 19 درسد اسکان اتنگ کن سنبرینگوک ءِ۔ وزیراعظم پارے کہ کنا مسخت ریاست مدینہ نا اصول آتیا ہندن ءُ اسلامی فلاحی ریاست اسے نا تخلیق ءِ ہراڑے بریبر شوندساری و زرگزرانی جدت مرے۔ وزیراعظم پارے کہ ہراوڑ اقوام متحدہ نا سیکرٹری جنرل پارے کہ نان وخت آتیٹی بے بریبری پک مسنے۔ داوخت آ دنیانا 26 ہزگار انگا بندغ آک نیمہ دولت نا مالک ءُ، ہزگار ملک آک کوویڈ تنکی آن پیش تمنگ کن 10 ٹریلین ڈالر متحرک کرینو وخت اس کہ ایلو کنڈآ پدتموک ملک آک دونیم ٹریلین ڈالرنا دوئی کننگ کن کوشست کننگ ءُ۔ وزیراعظم پارے کہ ننے نیزگاری نا چٹفنگ تون اوار اوار اونا سوب آتے ہم ایسر کروئی مریک، ملکی و جہانی کہول آ مالیاتی پیداواری و واپار نا پنجر آتے شفاف و مسابقتی جوڑ کروئی مریک۔ نیزگار ملک آتا وسیلہ غاتا استحصال ءِ بند کروئی مریک، وڈی خوری وڈوہ انا بھرم آتون اوار اوار پلوک آ میرات ہراملک آتیان ہلنگا اوفتے پدی تروئی مریک و شون ہلوک ملک آتے کوویڈ تنکی آن پیش تمنگ کن کمک کروئی مریک۔ نیزگار ملک آتے وام تیٹی ریلیف نا مد اٹ کمک نا گرج ءِ ہرافتا درشانی ءِ ای اپریل اٹ ہم کریسٹ کہ پوسکن آ خصوصی ڈرائنگ رائٹس ءِ تخلیق کننگے و آفیشل شونداری کمکاری ءِ ودفنگے۔ وزیراعظم پارے کہ پائیدار شونداری ہدف خاص کر پائیدار انفراسٹرکچر اٹ بھلو زرکاری اسے نا کمک اٹ اودے ترند کننگے، قابل تجدید توانائی، ٹرانسپورٹ، ہاؤسنگ، دِیر، انفراسٹرکچر و جان جوڑی آ زیات زرکاری نا گرج ءِ، پوسکن آ شونداری دور اٹی بننگ کن پدتموک ملک آتے دا قابل کننگے کہ او پوسکن آ ٹیکنالوجی و ڈیجیٹل ذریعہ غان فائدہ ہرفنگ کیر۔ وزیراعظم پارے کہ اودے بھروسہ ءِ کہ دا اہم دود جہانی نیزگاری نا چٹفنگ و پائیدار شونداری نا ہدف آتا مون آ دننگ کن ننا اجتماعی جنگ اٹ اہم پک مریک۔
