اسلام آباد۔ 23 ستمبر (اے پی پی) پاکستان و قطر ہڑتوم آ ملک آتا نیام اٹ پارلیمانی رابطہ غاتے سوگو کننگ نا گرج آ زور شاغسا جہانی و علاقائی امن تون اوار اقتصادی کمکاری نا بشخ آتیٹی اواری اٹ مون آ ہِننگ آ امنا کرینو۔ چارشنبے نادے آ اسپیکر قومی اسمبلی اسد قیصر تون قطر انا سفیر شیخ سعود بن عبدالرحمان بن فیصل الثانی پارلیمنٹ ہاؤس اٹ اوڑدہی کرے ہراٹی ہڑتوم آ کنڈآتا تعلقداری تون اوار ایلو اہم علاقائی باندات آ سرجم گپ وتران کننگا۔ داوخت آ اسپیکر اسد قیصر پارے کہ پاکستان تینا ایلم ملک قطر اتون تعلقداری تے بے کچ اہمیت ایتک۔ قطر ہر مشکل ساہت اٹ مدام پاکستان تون تفینے۔ پاکستان قطر اتون پارلیمانی رابطہ و دوستانہ تعلقداری تے پین مون آ دننگ نا خواہندار ءِ۔ ہڑتوم آ ملک آک پارلیمانی ڈٹ آتا ہن و بر اٹ اسہ ایلو نا آزموندہ غاتیان فائدہ ہرفنگ کیرہ۔ پاکستان علاقائی شونداری، واپار، توانائی و زرگزران نا سوگوی کن قطر اتون اولیتی بنداو تیا شریداری خواہک، اسپیکر قومی اسمبلی پارے کہ سی پیک ڈٹ آن ڈیہہ ٹی شونداری نا پوسکن ءُ کسر ملنگک ہراڑآن روزگار نا پوسکن ءُ وارخواہی ودی مریک۔ قطر انا سفیر پارے کہ قطر پاکستان تون تینا خڑکی تعلقداری تے بھاز قدر انا نظر اٹ ہرک۔ قطر پاکستان تون غٹ بشخ آتیٹی کمکاری ءِ برجاتخک۔ قطری زرکارآک پاکستان اٹ توانائی تون اوار ایلو بشخ آتیٹی زرکاری ءِ مون آ دننگ خوارہ۔ زرگزران نا سوگوی کن قطر پاکستان تون تینا ہروڑنا کمکاری ءِ برجاتخک۔
