اسلام آباد۔ 23 ستمبر(اے پی پی)مچ آ ملک اٹی قومی انسداد پولیو مہم مسٹ میکو دے ہم سرسہبی اٹ برجائس۔ انسداد پولیو مہم اٹی پنچ سال آن کم وئی نا 4 کروڑ آن زیات چناتے انسداد پولیو نا پڑی کنفنگک۔ فروری 2020ء آن پد دا اولیکو قومی انسداد پولیو مہم مریک ہراٹی مچ آ ملک انا 5 سال آن کم وئی نا چناتے پولیو آن بچفنگ نا پڑی کنفنگک۔ کورونا دین انا سوب آن منہ تُو اکن پولیو مہم آتے پد بٹنگاسس۔ بیان نا رداٹ افریقہ نا پولیو آن پاک مننگ آن پد بیرہ پاکستان و اوغانستان دنیا ٹی 2 ملک رہینگانو ہراڑے پولیو نا کیس آتا مون تروک ءِ۔ جاری مروک آ بیان اٹی وزیراعظم نا کمکار جان جوڑی ڈاکٹر فیصل سلطان پارے کہ افریقہ نا پولیو آن پاک مننگ آن پد پاکستان ءِ پولیو آن پاک کننگ کن زیات تندہی و جہد اٹ کاریم کننگ نا گرج ءِ۔ نن ملک آن پولیو نا پورو چٹفنگ کن گچین آن گچین پولیو مہم اس چلیفنگ نا کوشست کننگ اُن۔ داڑتون اوار اوار ہردے نا رکھی ٹیکہ غاتا نظام اٹ ہم گچینی اتنگ کن گام گیج کننگ انگ ءِ۔ داکان مست جولائی و اگست اٹ چنکو کچ اسے آ پولیو مہم آتا بناءِ کننگاسس ولے داوار 2 لکھ 70 ہزار آن زیات پولیو ورکرز اُراتیا ہنسا پنچ سال آن کم وئی نا چناتے پولیو آن بچفنگ کن پڑی کفنگ ءِ پک کیرہ۔ جولائی و اگست اٹ مروک آ مہم آتیانبار داوار ہم پولیو ورکرز آتے کورونا دین آن بچفنگ کن گچین تربیت تننگانے دُن کہ دوتا سلنگ، ماسک انا بیننگ و جوان ءُ فاصلہ اس تخنگ ءِ پک کننگ اوار ءِ۔ داکان بیدس پروگرام مہم اٹی کورونا نا دین اٹی قاعدہ و ضابطہ غاتیا عملدرآمد ءِ پک کرینے۔ قومی انسداد پولیو مہم نا بارواٹی ہیت کرسا کوآرڈینیٹر قومی ایمرجنسی آپریشنز سینٹر ڈاکٹر رانا صفدر پارے کہ لمہ و باوہ تینا چناتے مچ آ زند انامعذوری آن بچفنگ کن پولیوغان بچفنگ نا پڑی ضرور کنفر۔ نن کورونا دین آن بچنگ کن پورو بست وبند کرینن تانکہ لمہ و باوہ و پولیو ورکرز آتے کورونا نا دین آن پورو وڑاٹ رکھ تخنگے انتئے کہ ننکن الس نا جان جوڑی نا خیال ءِ تخنگ اولیت ءِ۔ ’’پولیو وائرس نا رسک ءِ ککم کننگ کن انسداد پولیو پروگرام اینخو سال پین پولیو مہم آتے چلیفنگ نا بست وبند ہم کرینے۔ داکان بیدس جان جوڑی ہند آتیٹی چناتے رکھی ٹیکہ غاتا چرجوئی ہم برجاسلک۔ پولیو آن پنچ سال اسکان نا وئی نا چناک زہمی مریرہ۔ داناجوڑی آن چناک مچ آ وئی کن معذور مریرہ۔ حتی کہ چناتا مرک ہم واقع مریک۔ دا مرض آن چناتے پولیو آن بچفنگ نا پڑی کنفسا جان ءِ خلاس کننگ مریک۔ پنچ سال آن کم وئی چناتے پولیو پڑی کنفسا دا دین ءِ تالان آن بچفنگ مریک۔ وار وار پولیو پڑی کنفنگ آن دنیا نا غٹ ملک آن پولیو آن پاک مسنو۔ انسداد پولیو مہم اٹ زیات آن زیات بشخ ہلنگ ننا غٹ انا قومی فرض ءِ۔
