اسلام آباد۔ 23 ستمبر (اے پی پی) وزیر خارجہ مخدوم شاہ محمود قریشی پارینے کہ پاک چین بے مٹ سنگتی مچ آ دنیا ٹی اسہ درور اس مسنے ، پاکستان و چین سی پیک نا ارٹ میکو مرحلہ ٹی اوار غٹ ڈٹ آتا زوت پوروی کن سنبرینگوک ءُ۔ داہیت ءِ او پاکستان اٹ چین نا سفیر یاؤ جنگ اتون گپ وتران اٹی پارے ہرا چارشنبے نادے آ وزارت خارجہ ٹی اوڑتون سپاروکی اوڑدہی کرے۔ اوڑدہی ٹی ہڑتوم آ کنڈآتا تعلقداری، پاک چین اقتصادی راہداری تون اوار تین پہ تینی است خواہی نا باندات آتیا گپ وتران کننگا۔ وزیر خارجہ پارے کہ پاکستان و چین نا نیام اٹ بے مٹ سنگتی اینو مچ آ دنیا ٹی اسہ درور اس مسنے۔ وزیر خارجہ دورہ ماسکو ٹی چینی ہم منصب وانگ ژی اتون مروک آ خصوصی اوڑدہی نا حوالہ ءِ ترسا پارے کہ پاکستان و چین نا سرکڑدہ غاک اقتصادی راہداری نا ارٹ میکو مرحلہ ٹی اوار غٹ ڈٹ آتے زوت پوروی اسکان سرکننگ کن سنبرینگوک ءُ۔ وزیرخارجہ پاکستان و چین نا نیام اٹ تعلقداری تے پین سوگو کننگ نا بابت چینی سفیر نا خذمت آتا ستاءِ کرے و دا اومیت نا درشانی ءِ کرے کہ اوڑآن پد بروک آ چینی سفیر ہندا جوزہ اٹ کاریم ءِ برجاتخک۔ وزیر خارجہ چینی سفیر ءِ اونا خذمت آتا امنائی اٹ ہلال پاکستان ایوارڈ ملنگ آ مبارکبادی ہم تس۔ چین نا سفیر پاکستان اٹ اڈ کننگ اٹ کمک فراوان کننگ آ وزیر خارجہ مخدوم شاہ محمود قریشی نا منت واری ءِ ہرفے۔ وزیر خارجہ دزکش مروک آ چینی سفیر ءِ یات گاری شیلڈ اس تس۔
