اسلام آباد۔ 23 ستمبر (اے پی پی) وزیراعظم نا سلاہکار داخلہ و احتساب شہزاد اکبر پارینے کہ نیب انا کنڈآن منی لانڈرنگ کیس اٹ شہباز شریف و چناتا برخلاف ریفرنس دائر کننگانے، نیب گچین جاست وپاست کرسا پبی شاہدی یکجا کرینے۔ ایف آئی اے شوگر کمیشن رپورٹ نا چرجوئی ٹی جاست وپاست کننگ ءِ، رمضان شوگر ملز انا 11 ملازم آتا اکاؤنٹس آتا کمک اٹ 9 نیم ارب نا منی لانڈرنگ مس، منظم گینگ منظم وڑاٹ منی لانڈرنگ کرے، شہباز شریف مہالو ہم کنا سوج آتا ورندی ءِ تتو، اینو اوڑآن 4 سوج ہریفینن، میڈیا غا سفائی تروک آ عدالت اٹ سفائی پیش کے۔ او چارشنبے نادے آ داڑے پریس کانفرنس آن تران کریکہ۔ سلاہکار داخلہ و احتساب شہزاد اکبر پارے کہ دا پاننگ خواوہ کہ منی لانڈرنگ نا نیٹ ورک ہمہ ہنا، شہباز شریف و اونا خاہوت منظم وڑاٹ تینا آلہ کار تا کمک اٹ منی لانڈرنگ کریر۔ اوٹی ٹیز نا کمک اٹ مالی فائدہ دوئی کریر، تینا کاروبار ءِ ودفیر۔ اوپارے کہ نیب انا کنڈآن منی لانڈرنگ کیس اٹ شہباز شریف و چناتا برخلاف ریفرنس دائر کننگانے۔ سرجم جاست وپاست آ نیب انا ٹیم ءِ کریڈٹ کاہک۔ نیب انا رپورٹ 55 والیم و 25 ہزار پنہ غاتیا تالان ءِ ہرا پبی دستاویزی شاہدی تیا مبنی ءِ، داریفرنس اٹ 16 بندغ پندار ءُ ہرافتیان 6 انا تعلق شہباز شریف خاہوت آن ءِ ، 10 دوبہ دار اونا آلہ کار ءُ۔ دا کیس اٹ 4 بندغ تینا گناہ ءِ امنا کرسا سلطانی گواہ جوڑ مسنو۔ اوپارے کہ مسہ کمپنی ہم دا منی لانڈرنگ نیٹ ورک نا بشخ ءُ، 177 جعلی ٹی ٹیز ہم نیب ریفرنس نا حصہ ءُ۔ حمزہ شہباز نا اکاؤنٹ اٹ بروک آ پیسہ غاتا سرجم ہم ریفرنس اٹ درج ءِ۔ سلاہکار داخلہ پارے کہ ایف آئی اے شوگر کمیشن رپورٹ نا چرجوئی ٹی جاست وپاست کننگ ءِ، رمضان شوگر ملز انا 11 ملازم آتا اکاؤنٹ آتا کمک اٹ 9 نیم ارب نا منی لانڈرنگ مس، منی لانڈرنگ نا پیسہ غاتے شہباز شریف و اونا خاہوت تینا جند انا فائدہ کن استعمال کریر۔ اوفتا درآمد مروک لینڈ کروزر نا کسٹم ڈیوٹی منی لانڈرنگ نا زرآتیان ادا کننگا، ڈی ایچ اے ٹی 2 اُرا ہندا منی لانڈرنگ نا زر آتیان ہلنگا، شہباز شریف تینا اُرائی ءِ اسہ اُراس ٹیکی ٹ ہلسا تس۔ دا اُرا ہم ہندا زر آن ہلنگا، منظم گینگ منظم وڑاٹ منی لانڈرنگ کرے۔ اوپارے کہ رمضان شوگر ملز انا 11 دوبہ دار آتا جعلی اکاؤنٹ آتے ملنگا و اوفتے ٹی ساڑے نہہ ارب روپئی نا زر منی لانڈرنگ نا کمک اٹ گدریفنگا، دا ملازم آتیٹی ملک مقصود2.3 ارب روپئی، رضاعباس1.2 ارب روپئی، غلام شبر 1.1 ارب روپئی، خضرحیات1.4 ارب روپئی، محمد غواث 880 ملین روپئی، اکرام حسین 650 ملین روپئی، تنویر 512 ملین، توقیر الدین 480 ملین، گلزار احمد 425 ملین، مسرور احمد 230 ملین و رانا وسیم نا اکاؤنٹ اٹی 250 ملین روپئی شاغنگا و ولدا کشنگا۔ دا رمضان شوگر ملز شہباز شریف خاہوت نا ملکیت ءِ، حمزہ شہباز و سلمان شہباز دانا کاروبار ءِ ہُننگ ءُ۔ اوپارے کہ شہباز شریف نا اینو 70 می سال دے ءِ، اینو نادے بایدے او راست پائے، شہباز شریف داکان مست ہم کنا 17 و ولدا 12 سوج آتا ورندی ءِ تتنے ولے اینو اوڑآن 4 سوج ہریفیوہ، انت سلمان شہباز و حمزہ شہباز اونا ایماء آ 2008 ء آن 2018 ء ٹی کرپشن کرسا ہنار و کک بیکس ہلسا کری؟ دا کرپشن ءِ حلال کننگ کن منظم منی لانڈرنگ کننگا، سلمان شہباز آن جند انا کاریم اٹ اتنگ کن پیسہ ہلسا کرے، لندن اٹ اونا مفرور مار سلمان شہباز و مفرور سالم علی عمران ہرا وسیلہ غاتا کمک اٹ تینا خڑچ آتے پورو کیرہ انتئے کہ اوفتا ہمیڑے ہچ ءُ کاروبار اس اف۔ اوپارے کہ شہباز شریف ءِ اونا ایلم نا مسڑ اونا سال دے انا وخت آ پارٹی آن کشانے ہراکہ است ہسونی اسے، اوبایدے بزرگ آتا احترام ءِ کے، ای ہم بزرگ آتا احترام ءِ کیوہ۔ اوپارے کہ او 2 گھنٹہ ٹی وی آ تولسا بھاشن ایتک تو جان جوڑ مریک ولے ہراتم عدالت نا ہیت مریک تو اونا صحت خراب مریک، میڈیا غا سفائی تروک آ عدالت اٹ سفائی پیش کے۔
