کشمیری الس ءِ حق خودارادیت ملنگ اسکان کشمیر نا ویل ءِ دنیا نا ہرفورم آ ہرفسا کینہ
اسلام آباد۔ 22 ستمبر (اے پی پی) وزیر خارجہ شاہ محمود قریشی پارینے کہ کشمیری الس ءِ حق خودارادیت ملنگ اسکان کشمیر نا ویل ءِ دنیا نا ہر فورم آ ہرفسا کینہ۔ بھارت تینا جارحانہ عزم انا سوب آن مچ آ ڈیہہ نا امن و ایمنی ءِ گہیو تخنگ ءِ۔ داہیت ءِ او خصوصی کمیٹی کشمیر نا شش می دیوان آن تران کرسا پارے۔ دیوان سے شنبے نادے آ وزیر خارجہ نا کماشی ٹی وزارت خارجہ ٹی اڈ ہلک۔ دیوان اٹی مقبوضہ جموں و کشمیر اٹ برجا انسانی حق انا بھلا خلاف ورزی و لین آف کنٹرول (ایل او سی) آ بھارتی اشتعال انگیزی تون اوار چندی باندات آ گپ وتران کننگا۔ دیوان اٹی وزیراعظم نا خصوصی کمکار قومی سلامتی معید یوسف، پارلیمانی سیکرٹری کانود بیرسٹر ملیکہ بخاری، سیکرٹری کانود راجہ نعیم اکبر، تون اوار سول و عسکری کمامدارآک ساڑی ئسر۔ شاہ محمود قریشی پارے کہ جہانی کانود ءِ پد پشت تخسا بھارت نا کنڈآن مقبوضہ جموں و کشمیر اٹ انسانی حق انا پدریسہ لتاڑ و لین آف کنٹرول آ خارتس سم کاری بھلو گڑتی اسے۔ بھارت نا انسانی حق انا لتاڑتیان تعلقدار ڈوہ انا فہرست بھاز مرغن مرسا ہِننگ ءِ۔ کودک کشمیری تے بھارتی استبداد آن نجات ترفنگ کن جہانی برادری ءِ مون آ بروئی مریک۔ اوپارے کہ وزیراعظم عمران خان اقوام متحدہ جنرل اسمبلی نا ہفتاد ءُ پچ می دیوان نا وخت آ تینا تران اٹ کشمیر نا حالیت آتے مچ آ دنیا نا مون آ تخنہ۔ و جہانی برادری نا چکار ءِ بھارتی بیدادی نا کنڈآ کرفنہ۔ مخدوم شاہ محمود قریشی پارے کہ پاکستان، کشمیر نا ویل ءِ ہر فورم آ ہمووخت اسکان ہرفسا کیک ہراتم اسکان کشمیری تے اقوام متحدہ نا سیکورٹی کونسل نا قرارداد آتے مون آ تخسا اوفتا رواحق، حق خودارادیت اوفتے ملپک۔
