اسلام آباد۔ 22 ستمبر (اے پی پی) وزیر خارجہ مخدوم شاہ محمود قریشی پارینے کہ جموں و کشمیر و فلسطین نا جھیڑہ غاک اقوام متحدہ نا دیرینہ و پیدوار انگا بے سہبی تا درشانیک ءُ۔ کشمیری الس تینا حق انا دوئی کننگ کن اینو ہم چاری ءُ، ہرانا اقوام متحدہ اوفتے تون قول کریسس۔ واک انا کاریم اٹ اتنگ نا مون آ بیوس خننگک۔ ارٹ میکو جنگ عظیم نا سوب مروک آ نسل پرستی و فسطائی واکداریک درملکی و اسلام آن خار انا دروشم اٹ دُوارہ کاٹم ہرفنگ ءُ۔ فسطائی نظریہ غاتیا سلوک پین ہندن ءُ ملک ہم ارے ہرا اقوام متحدہ نا اصول آتے سرعام لتاڑرہ۔ سے شنبے نادے آ نیویارک اٹ اقوام متحدہ نا ہفتاد ءُ پنچ می سال دے آ ویڈیو لنک انا کمک اٹ تران کرسا وزیر خارجہ پارے کہ جنگ انا اذیت ناک سختی و بھس کاری و گڑاسے نا ایلوفتیا برتری نا غلط نظریہ غاتا راکھ آن اقوام متحدہ نا اومیت ودی مسوسس۔ دا ادارہ نا جوڑ مننگ اسہ تاریخی المی خواست آتے پورو کریسس۔ او المی خواست دائس کہ ’’بروک آ چین تے جنگ انا عنفریت آن بچفنگے‘‘۔ و مردوزن، چنکا بھلا قوم مننگ آن ایڑتر، اوفتا مساوی و بنداوی حق آتا رکھ و آبیاری کن تینا عہد نا درشانی ءِ کرسا، زیات آجوئی اٹ زند انا آب ءِ گچین کننگ نا جستجوکننگے۔ دارداٹ ننا اقوام متحدہ بھلو سفر اس طے کرینے۔ داادارہ بنی نوع انسان ءِ اسہ ہی نوع انا واقعہ غاتیان دوچار مننگ و نتیجتا بھس کاری آن بچفنگ اٹ کمک کرینے۔ ولے دا خوشی تے اڈ ترسا ننے دانا نزوری و بے سہبی تے گوجالوئی اف۔ اونا جم سرسہبی تتون اونا بے سہبی تے اوار کرسا ہروئی مریک۔ دا تنظیم ہموحد اسکان جوان ءِ ہراحد اسکان اونا باسک ریاست آک اودے جوان ہُننگ نا خواہندار ءُ۔ اوپارے کہ جموں و کشمیر و فلسطین نا جھیڑہ غاک دا ادارہ نا دیرینہ و پیدوار بے سہبی تا درشانی تیان ءُ۔ مقبوضہ جموں و کشمیر نا الس استصواب رائے نا تینا حق انا دوئی کننگ کن اینو ہم چاری ءُ، ہرانا اقوام متحدہ اوفتے تون وعدہ کریسس۔ وزیر خارجہ پارے کہ اقوام متحدہ غا اینو گپ شپ انا جاگہ غا، مننگ نا طنز مننگ ءِ۔ اونا قرارداد و فیصلہ غاتے لتاڑنگ انگ ءِ، تین پہ تینی کمکاری خاص وڑاٹ سلامتی کونسل نا باندات اٹی کم انگا کہول آٹے۔ اوپارے کہ واک انا بہیمانہ کاریم اٹ اتنگ نا مون آ بیوس خننگک، جہانی چاگڑد نا رکھ و شونداری نا خاطر جوڑ کروک کلیدی معاہدہ و عہدنامہ غاتے ہرفسا خسنگ انگ ءِ۔ ارٹ میکو جنگ عظیم نا سوب مروک آ نسل پرستی و فسطائی واکداریک درملکی و اسلام آن خار انا دروشم اٹ دُوارہ کاٹم ہرفنگ ءِ۔ دُن تو کورونا دین انا مقابلہ کن نن، بے پناہ جہانی کمک خنانن ولے دا ادارہ بنی نوع انسان ءِ داوڑ یکجا کننگ اٹ بے سہب مسنے ہراوڑ کہ اودے کننگ مسکہ۔ پاکستان 26 ملک آتا 47 مشن تیٹی 2 لکھ دستہ تسنے ہرافتیان ننا 157 جواں مرد شہید مسر۔ وزیر خارجہ پارے کہ دنیا ٹی غٹ آن بھلا کچ اٹ باہوٹ آتا مہمانداری کروک آ ہم ننا ملک ءِ۔
