اسلام آباد۔ 22 ستمبر (اے پی پی) بنجائی وزیر آبی وسیلہ فیصل واوڈا اپوزیشن نا آل پارٹیز کانفرنس(اے پی سی) ءِ ناجوڑ نا ڈرامہ اس گوندسا پارینے کہ اپوزیشن ریاستی ادارہ غاتے سیاست نیام شاپ۔ داہیت ءِ او نجی ٹی وی چینل تون گپ وتران اٹی پارے۔ فیصل واوڈا اپوزیشن نا کنڈآن فوج و نیب اتون اوار ریاستی ادارہ غاتے تنقید نا حدف کننگ آ سخت تنقید کرے۔ اوپارے کہ پیپلزپارٹی و مسلم لیگ (ن) نا سرکڑدہ غاک تینا جند انا فائدہ غاتے اولیت تننگ نا جاگہ غا قومی فائدہ غاتا خاطر قومی ادارہ غاتا احترام ءِ کیر۔ اوپارے کہ اپوزیشن نا سیوت ملک اکن آخا بلکن تینے بچفنگ کن ءِ، اپوزیشن مسلم لیگ (ن) نا نائب صدر مریم نواز شریف ءِ پیشن نا ملک آ گدریفنگ کن سیاست کننگ ءِ ولے اودے پیشن نا ملک آ ہِننگ نا موکل تفننگک۔ او است ہسونی نا درشانی ءِ کرے کہ عدالت آن نروک نواز شریف لندن اٹ سیاسی سرجز آتیٹی بشخ ہلنگ کن دراخ جوڑ ءِ ولے عدالت آتون مون تننگ کن تینا وطن آ پدی بننگ کپک۔ بنجائی وزیر آبی وسیلہ پارے کہ دا کرپٹ جماعت آک اسہ وار ولدا پک کرینو کہ او بیرہ تینا جند انا فائدہ غاتا رکھ اکن مچ مسر۔ مسلم لیگ ن و پیپلزپارٹی ہڑتوم آک ملک ءِ گوجالار۔ اسہ سوج اسے نا ورندی ٹی اوپارے کہ ریاستی ادارہ غاتے سیاست اٹ نیام شاغنگ مدام نواز شریف و اونا پارٹی نا وطیرہ مسنے۔ اپوزیشن تعمیری ایجنڈاتون برے و گچین مروک فورم تیا حقی باندات آتے چست کے۔
