بیجنگ۔ 22 ستمبر (اے پی پی) چین صدر ڈاکٹر عارف علوی نا ہمو بیان نا ستاءِ کرینے ہراٹی او اوغانستان و نیامی ایشیانا علاقائی فائدہ غاتے مون آ دننگ اٹ پاک چائنہ اقتصادی راہداری نا اہمیت نا ذکر ءِ کریسس۔ بیجنگ اٹ وزارت خارجہ نا ترجمان وانگ وین بن اسہ سوج اسے نا ورندی ٹی اے پی پی ءِ پارے کہ ہراوڑ صدر علوی پیدواری کرینے کہ سی پیک اٹ نئے بیرہ چین و پاکستان نا الس نا فائدہ ءِ بلکن داڑآن علاقائی شونداری نا کسرہم ملنگک و ڈیہہ نا غٹ ملک آتیٹی زرگزرانی کمکاری ءِ مون آ دننگک۔ اوپارے کہ سی پیک بیلٹ اینڈ روڈ ڈٹ انا اہم پائلٹ پروگرام ءِ ہرا پاک چین کمکاری نا نمان علامت ءِ۔ اومستی پارے کہ شش سال مست بناکروک آ پروجیکٹ آتیٹی بھلو پیش رفت اس مسنے و 25 بلین ڈالر آن زیات نا براہ راست زرکاری پاکستان آ بننگ ءِ۔ اومستی پارے کہ ایسر اسکان سرمروک آ ڈٹ آتیٹی پاکستان اٹ ہڷ وتس نا بنداوی پنجر و بجلی نا فراوانی ٹی گچینی بس وخت اس کہ روزگار نا 70 ہزار وارخواہی ودی مس، جم قومی کٹیا ٹی اسٹ آن اِرا درسد سالانہ ودکی خننگا وخت اس کہ راجی اقتصادی شونداری و الس نا آسراتی ءِ مون آ دننگا۔ اوپارے کہ چین سی پیک نا شونداری نا پرزور مخ تفی ءِ کیک۔ اوپارے کہ نن تینا سرکڑدہ نا فیصلہ نا رداٹ بنداوی پنجر نا مون آ دننگ، راجی شرحالی و صنعتی و کشاری کمکاری نا بنداو آ پاکستان تون اواری اٹ کاریم کننگ کن سنبرینگوک اُن تانکہ سی پیک ءِ بیلٹ اینڈ روڈ انیشی ایٹو نا شونداری نا اسہ عملی ءُ ڈٹ اسے ٹی بدل کننگے و دانا فائدہ غاک نئے بیرہ ہڑتوم آ ملک بلکن مچ آ ڈیہہ اسکان سرمریر۔ یات سلے کہ صدر ڈاکٹر عارف علوی تینا ترکمن ہم منصب گربنگولی بردی محمدوف تون ٹیل فون آ گپ وتران کریسس کہ چین پاکستان اقتصادی راہداری علاقائی رابطہ غاتے مون آ دیک۔ خاص کر اوغانستان و نیامی ایشیائی ملک آتے اونا سڑک و ریلوائی نا بنداوی پنجر آن فائدہ مریک۔
