کوئٹہ۔ 21 ستمبر (اے پی پی) وزیراعلیٰ بلوچستان جام کمال خان پارینے کہ حکومت اپوزیشن حلقہ غاتے گوجالنگ نا کلچر ءِ چٹفینے ۔ خاص انگا علاقہ غاتے نوازفنگ نا عمل السی اہمیتءِ دیک۔ بلوچستان اٹ بیرہ ہشت یونیورسٹی ءُ ہرافتے ٹی ہم گڑاس سب کیمپس ءُ ہنداخاطرآن ننا حکومت نا فوکس یونیورسٹی تا کیمپس آتے ودفنگ آٹے۔ میڈیا ریاست نا چارمیکو اہم تمبہ ءِ ساڑی حکومت صوبہ ٹی میڈیا نا شونداری و شونہالی کن غٹ وسیلہ غاتے کاریم اٹ اتنگ ءِ۔ تحریر و تقریر نا آجوئی ٹی حکومت اڑاند شاغتنے۔ کوئٹہ پریس کلب تون گنڈوک صحافی تا خذمت نئے بیرہ صحابت بلکن صوبہ نا شونداری و شونہالی کن ہم اہم ءِ۔ کوئٹہ پریس کلب نا گولڈن جوبلی دود اڈتننگ و پنجا سال پورو کننگ آ کوئٹہ پریس کلب نا انتظامیہ و غٹ باسک آتے مبارکبادی ایتیوہ۔ کوئٹہ پریس کلب نا بنداو ءِ جواد حیدر و رشید بیگ کون آ سینئر صحافیک خلوص نیت و میرٹ آ تخار و داسہ پریس کلب اسہ تناو درخت اس جوڑ مسنے۔ داخیال آتا درشانی ءِ او دوشنبے نادے آ کوئٹہ پریس کلب نا گولڈن جوبلی نا بناءِ کننگ نا وخت آ اڈ ہلوک آ دود آن تران کرسا کرے۔ داوخت آ صوبائی وزیر خزانہ ظہور احمدبلیدی، پریس کلب نا صدر رضاء الرحمان، صوبائی سیکرٹری حوالکاری شاہ عرفان غرشین، پاکستان فیڈرل یونین آف جرنلسٹ نا نائب صدر سلیم شاہد، پریس سیکرٹری وزیراعلیٰ کامران اسد، ڈپٹی کمشنر کوئٹہ اورنگزیب بادینی، سینئر صحافی انورساجدی، جوادحیدر تون اوار ایلوفک ہم ساڑی ئسر۔ وزیراعلیٰ بلوچستان جام کمال خان پارے کہ ہراتم اہل مخلوق مون آ بف تو تباہی مریک ننے زبان رنگ و نسل و مذہب نا پرخ آن ایڑترمرسا سجفوئی مریک۔ انفرادی سوچ قوم تے فریشانی آن دوچار کیک۔ مستین اٹ بھلو فیصلہ و تعیناتی کننگ نا وخت آ میرٹ ءِ گوجالنگا ہرا نیک شگون اف اہل بندغ آتے پاننگ نا گرج مفک۔ قابلیت آ سمجھوتہ کننگ آن زند انا باندات آتے بھاز بے وڑ زہمی کیک۔ نظم و ضبط آن بیدس خذمت آتا تصور ممکن اف بلکن قوم تیٹی بگاڑ بریک۔ جوان انگا ادارہ غاک جوان انگا مخلوق ءِ مون آ اتنگ کیرہ۔ تنقید داخاطرآن مریک کہ ہروک آ کمتی محسوس کیک۔ تحریر و تقریر نا آجوئی ٹی حکومت اڑاند شاغتنے۔ اوپارے کہ ننے مثبت کاریم تے ہم مون آ اتوئی مریک۔ صوبائی حکومت میڈیا غا قدغن خلنگ نا وخت اس ہم کوشست کتو۔ نن آجوئی صحافت ءِ پین سہی کنڈاسکان دننگ اُن و میڈیا ءِ پین رسینگ تننگ اُن تانکہ او صحافی الس ءِ گچین معلومداری فراوان کننگ کے۔ چونکہ بلوچستان اٹ صحافت آسان ءُ کاریم اس اف و بلوچستان نا صحافی سخت حالیت آتیان گدرینگ انگ ءُ بلوچستان اٹ صحافت تون اوار ہر بشخ اٹ زرکاری نا گنجائشت ارے۔ بروک آ چین تا خیال ءِ تخنگ اہم قومی فرض اسے حکومت مدام میڈیا تون تفک۔ کڑد سازی و ادارہ فعال مننگ آن قوم انا لائخی مون آ بریک۔ دوداناایسر آ کوئٹہ پریس کلب نا صدر رضاء الرحمان وزیراعلیٰ جام کمال و ایلو مہمان تے پریس کلب نا گولڈن جوبلی نا دود آتا یات گاری شیلڈ پیش کرے ۔ دود آن صوبائی وزیر خزانہ ظہور احمد بلیدی و ایلوفک ہم تران کریر۔
