کوئٹہ۔ 21 ستمبر (اے پی پی) وزیراعلیٰ بلوچستان جام کمال خان پارینے کہ صوبائی حکومت و اونا ادارہ غاک کورونا وائرس نا چیلنج تون مون تننگ کن سرسہب کوشست کرینو ولے موسم نا بدل مروک آ حالیت آتا سوب وائرس نا تالانی ٹی ودکی نا گڑتی ءِ ہرافتا ازالہ کن پین خواری کننگ نا گرج ءِ، بلوچستان اولیکو صوبہ ئس ہراکورونا وائرس تون مون تس و وائرس نا تالانی ءِ توننگ کن گچین گام گیج کرے۔ بلوچستان کمانڈ اینڈ آپریشن سینٹر شعبہ جان جوڑی نا چاہندار آتاسلابت اٹ بروک آ دے تیٹی وائرس نا تالانی ءِ توننگ کن سمارٹ لاک ڈاؤن تون اوار ایلو گام گیج آتے چست کننگ نا سلاہ و سوج تیار کرسا دمدستی وڑاٹ حکومت ءِ پیش کے۔ خاص وڑاٹ تعلیمی ادارہ غاتا ملنگ و تعلیمی عمل نا بنانا رداٹ دین انا تالانی نا حالیت آتا گچین مانیٹرنگ ءِ کننگے تانکہ دا بابت پک کروک حکمت عملی نا اول سرآن جاچ ءِ ہلنگ مرے۔ داخیال آتا درشانی ءِ او کورونا وائرس نا ساڑی حالیت آتا جاچ اکن اڈ ہلوک آ بڑزکو کہولی دیوان اٹی کرے۔ محکمہ جان جوڑی نا کنڈآن دیوان ءِ تعلقدار باندات آتیا سرجم حوال تننگا۔ دیوان اٹی ساڑی دے تیٹی دین انا تالانی ٹی ودکی ءِ گڑتی نا قابل گوندنگا، دیوان اٹی ساڑی چاہندار پبلک ہیلتھ و عمومی جان جوڑی دین انا تالانی نا رجحان نا جاچ ءِ ہلنگ کن کروک آ سٹڈی رپورٹ ءِ مون آ تخسا موسم نا بدلی نا زہم تا وڑاٹ کورونا وائرس نا تالانی ناگڑتی نا درشانی ءِ کریر۔ دیوان اٹی ہڑدے ئی بنداو آ کورونا وائرس نا ٹیسٹنگ نا کچ ءِ 2000 اسکان ودفنگ نا فیصلہ کننگا۔ دیوان اٹ کورونا وائرس نا ٹیسٹنگ نا کچ، ٹیسٹنگ لیبارٹری تا کارکڑد، کورونا وائرس نا گواچی بندغ آتا ٹریکنگ و ٹریسنگ نا میکنزم ناجاچ ءِ ہلسا فیصلہ کننگاکہ محکمہ جان جوڑی ءِ دانا گرج آتا رداٹ ٹیسٹنگ کٹ، پی سی آر مشین و پی پی ای کٹ اتون اوار ایلو ازباب آتا فراوانی ءِ پک کننگک و داڑکن دمدستی وڑاٹ فنڈجاری کننگک۔ وزیراعلیٰ پارت کرے کہ محکمہ داخلہ بی سی او سی و محکمہ جان جوڑی نا سلاہ وسوج آتا رداٹ سمارٹ لاک ڈاؤن ناحکمت عملی اس جوڑ کے وخت اس کہ محکمہ تعلیم نجی و سرکاری تعلیمی ادارہ غاتیٹی کورونا وائرس نا بچفنگ نا ایس او پی تیا عملدرآمدءِ ہر حال اٹ پک کننگے، اوپارے کہ کمشنر و ڈپٹی کمشنر ہم تینا ضلع غاتیٹی دین انا تالانی نا توننگ کن گام گیج آتے پک کیر۔ غٹ تعلقدار ادارہ غاک کورونا وائرس نا توننگ کن بڑزکو کہولی دیوان آتیٹی کروک آ فیصلہ غاتیا عملدرآمد کیر۔ و اوفتے فالو اپ کننگے، وزیراعلیٰ پارے کہ کورونا وائرس نا ساڑی چیلنج اتون مون تننگ کن غٹ ادارہ غاک تینا زمواری تے جوان وڑاٹ ادا کیر۔ اوپارے کہ جان جوڑی نا بشخ اٹ خذمت آتا فراوانی نا آب آ سمجھوتہ کننگ مفک و ہرابے ڈولیک مسنو اوفتا دمدستی ازالہ ءِ پک کننگے۔ وزیراعلیٰ سیکرٹری جان جوڑی و ڈائریکٹر جنرل جان جوڑی ءِ دوائی تا ہلنگ نا عمل ءِ شفافیت تون دمدستی وڑاٹ ایسر اسکان سرکننگ نا پارت کرے۔ ایڈیشنل چیف سیکرٹری داخلہ حافظ عبدالباسط، سیکرٹری جان جوڑی، دوستین جمالدینی، سیکرٹری خزانہ نور الحق بلوچ، سیکرٹری آئی ٹی یاور احمد، سیکرٹری حوالکاری عرفان غرشین، اسپیشل سیکرٹری جان جوڑی حافظ محمد طاہر، ڈائریکٹر جنرل جان جوڑی، پی ڈی ایم اے، بی سی او سی ناکمامدار، پبلک ہیلتھ و عمومی جان جوڑی نا چاہندار آک دیوان اٹی بشخ ہلکر۔
