اسلام آباد۔ 21 ستمبر (اے پی پی) بنجائی وزیر سینیٹر شبلی فراز، شاہ محمود قریشی، چوہدری فواد حسین ئسک پارینو کہ اپوزیشن اے پی سی ٹی فوج، عدلیہ، الیکشن کمیشن، نیب اتون اوار غٹ ریاستی ادارہ غاتے شست کننگا، انت ریاستی ادارہ و گچین کاری عمل ءِ جھیڑہ ئی جوڑ کرسا ملک وجمہوریت نا ہرا خذمت ءِ کننگ انگ ءِ، اسہ جمہوری حکومت اسے نا برخلاف غٹ مفاد پرست آک یکجا مسنو۔ نواز شریف نا تقریر آ بھارتی میڈیا بھاز خوشی کرے، بھارت نا غٹ بھلا اخبار تیٹی نواز شریف نا شہ سرخی ءِ کہ ‘‘نواز شریف فوج آ جلہو کرے’’ نواز شریف جان ءِ مون تروک خطرہ غاتیا عدالت نا کمک اٹ ملک آن پیشن ہناسس داسہ او جوان مسنے تو اودمدستی وڑاٹ پدی برے، اپوزیشن و دشمن دا سمجھرہ کہ اگہ پاکستان اٹ برجا جمہوری نظام اٹ اڑاند شاغنگتو تو ملک شونداری نا غٹ مزل آتے طے کیک، اینو اسکان عدلیہ نا برخلاف مروک آ چم آتیٹی نواز شریف نا کماشی ٹی مسلم لیگ ن اہم و بنداوی بشخ مسنے، قوم بایدے ہچ ءُ شک و شبہ سے ٹی مف کہ پیل انا دنان کُننگ کن پین و نشان تننگ کن پین مریرہ، اپوزیشن نا جمہوریت نا آخا بلکن ذات و اقتدار نادڑد زیات ءِ، وزیراعظم عمران خان تینا دوٹوک موقف آ سلوک ءِ کہ اسٹ اسے ہم این آر او تروئی اف۔ داخیال آتا درشانی ءِ بنجائی وزیر حوالکاری و شینکاری سینیٹر شبلی فراز، وزیر خارجہ شاہ محمود قریشی، بنجائی وزیر ڈٹ بندی اسد عمر، بنجائی وزیر سائنس و ٹیکنالوجی چوہدری فواد حسین دوشنبے نادے آ پی آئی ڈی ٹی پریس کانفرنس آن تران کرساکریر۔ بنجائی وزیر حوالکاری وشینکاری سینیٹر شبلی فراز پارے کہ وزیراعظم عمران خان نا پارت آتیا تدوک آ دے مروک آ اپوزیشن جماعت آتا آل پارٹیز کانفرنس(پی اے سی) ٹی سیاسی سرکڑدہ غاتا تقریر تے چلیفنگ کن ہلنگا۔پیپلزپارٹی تینٹ مولانا فضل الرحمان نا تقریر ءِ چلیفنگ کن الیتو، دانا کریڈٹ حکومت و وزارت حوالکاری ءِ کاہک۔ اوپارے کہ اپوزیشن اے پی سی ٹی گچین کاری عمل ءِ شکبر و دھاندلی زدہ کننگ نا کوشست کننگا حالانکہ راستکی و حساب و کتاب پاہک کہ ہندا شکست کنوک آک اگہ گچین کاری تے کٹرہ تو او گچین کاریک بھاز جوان و اگہ کٹفرہ تو دھاندلی زدہ مریرہ۔ دا لیڈر گچین کاری تیٹی شکست ءِ داسکان کیدنگ پننگ ءُ ہنداخاطرآن داسکان خیسن ہڑسینگانو۔ اوپارے کہ 2013ء نا گچین کاری تیٹی 413 الیکشن پٹیشن ئسر وخت اس کہ 2018ء نا گچین کاری تیٹی 299 پٹیشن فائل مس ہرافتیان 90 قومی اسمبلی نا حلقہ غاتا بابت ئسر، داحلقہ غاتیان گیشتری ہموحلقہ غاتا ءِ ہراڑے پی ٹی آئی نا باسک آک منہ وونٹ اٹی باتسوسر۔ وزیر خارجہ شاہ محمود قریشی پارے کہ اسہ نااومیتی نا گھٹا ئس دوہراہفنگا، تضاد آتا مجموعہ ءِ، دہشت گردی ءِ شکست تننگ و پاکستان کن قربانی تروک آ ادارہ پاک فوج انا مچ آ دنیا ستاءِ کننگ ءِ ولے دا مخلوق ہمونا خلاف ءُ۔ اوپارے کہ ہراتم نن اقتدار ءِ سنبھالان تو ملک انا زرگزران نا انت حالیت ئس او غٹ انا مون آٹے۔ غٹ سنگت ملک آک ننا کمک ءِ کریر و جہانی مالیاتی ادارہ غان ہم مثبت پیش رفت مون آ بس۔اوپارے کہ کوویڈ۔ 19 آ ملک ءِ بند کننگ نا درس تروک آک اینو پارہ کہ جنوری ٹی برانز، جلسہ جلوس کینہ حالانکہ چاہندار آتا پاننگ ءِ یخ آتیٹی کوویڈ۔ 19 نا پدی بننگ نا گڑتی ءِ۔ اوپارے کہ اپوزیشن ءِ ایف اے ٹی ایف نا بابت کانود جوڑ کننگ اتون ہچ ءُ کاریم اس اف۔ حکومت اوفتا و پاکستان نا دشمن تا عزم ءِ بے سہب کرسا اہم کانود سازی کرینے۔ اوپارے کہ اے پی سی ٹی پاننگاکہ حکومت اوغانستان تعلقداری تے گچین کننگ اٹ سرسہب متنے اوفتے پاننگ خواوہ کہ مچ آ دنیا اینو پاکستان نا معترف ءِ۔ اوغانستان اٹی سیاسی مفاہمت، وزیراعظم عمران خان نا ویژن ئس، انٹرااوغان ڈائیلاگ ہم بناکرینے، داپاننگاکہ کشمیر نا ویل ءِ گچین تالان کتوس اوفتے پاننگ خواوہ کہ اقوام متحدہ نا سلامتی کونسل دیوان اٹ جیرت اٹ باندات ءِ عمران خان چست کرے داڑتون اوار اوار او ہر جہانی فورم آ کشمیر نا ویل ءِ کشمیری تا کیل و سفیر مرسا ہرفے۔ بنجائی وزیر ڈٹ بندی، شونداری و اصلاحات اسد عمر پارے کہ فٹیف کانود سازی آ اپوزیشن سجفے دا این آر او نا گچین ءُ وڑوڈول اسے، فیٹف کانود سازی آ اپوزیشن نا 34 ترمیم بلیک میلنگ ئسر، فٹیف کانود سازی ٹی اپوزیشن بوز اٹ کُنگ۔ اینٹی منی لانڈرنگ کانود پاس مننگ آن اوفتا میرات آتے خطرہ ءِ۔ اوپارے کہ فاٹا ٹی شونداری کاریم مننگ ءِ۔ کراچی نا شونداری کن تاریخی پیکج تننگا۔ فٹیف کانود سازی نا ہچ ءُ سیاسی پارٹی اسے تون تعلق اف۔
