اسلام آباد۔ 21 ستمبر (اے پی پی) وزیراعظم عمران خان پارینے کہ سرکاری خزانہ غان تروک آ سبسڈی تا مسخت راج انا نزور تپہ غاتا کمک و راجی و زرگزرانی شونداری نا مون آ دننگ ءِ، بے حقدار بندغ آتا سبسڈی نا نظام آن فائدہ ہرفنگ نئے بیرہ سرکاری وسیلہ غاتا زیان ءِ بلکن حقدار آتا حق ءِ خلنگ نا سوب مریک ہنداخاطرآن دا نظام اٹ اصلاحات حکومت نا اولیت ءِ۔ او دوشنبے نادے آ داڑے حکومت نا کنڈآن چندی بشخ آتیٹی تروک آ سبسڈی نا نظام ءِ شفاف و منظم کننگ و داکمکاری ءِ حقدار اسکان سرکننگ ءِ پک کننگ نا بابت دیوان نا کماشی ءِ کریکہ۔ دیوان اٹی وزیر صںعت محمد حماد اظہر، سلاہکار خزانہ ڈاکٹر عبدالحفیظ شیخ، سلاہکار واپار عبدالرزاق داؤد، خصوصی کمکار ڈاکٹر ثانیہ نشتر، ڈاکٹر شہباز گل، مسکوہی سیکرٹری خزانہ ڈاکٹر وقار مسعود و ایلو سینئر آفیسر آک ساڑی ئسر۔ مسکوہی وزیر خزانہ شوکت ترین، سلطان علی الانہ، عارف حبیب، ڈاکٹر اعجاز نبی ویڈیو لنک انا کمک اٹ دیوان اٹی بشخ ہلکر۔ وزیراعظم میڈیا آفس نا رداٹ حکومت نا کنڈآن چندی بشخ آتیٹی بالواسطہ و بلاواسطہ فراوان کروک آ سبسڈی تا مقدار و دانظام اٹ اصلاحات نا بابت چندی سلاہ تیا سجفنگا۔ وزیراعظم عمران خان دیوان آن تران کرسا پارے کہ سبسڈی نا باندات اٹی حکومت نا اولیت بے کچ پیداوار ءِ۔ اوپارے کہ سرکاری خزانہ غان فراوان کروک آ سبسڈی تا مسخت راج انانزور تپہ غاتا کمک و راجی و زرگزرانی شونداری نا مون آ دننگ ءِ۔ وزیراعظم پارے کہ بے حقدار بندغ آتا سبسڈی نا نظام آن فائدہ ہرفنگ نئے بیرہ سرکاری وسیلہ غاتا زیان ءِ بلکن حقدار آتا حق ءِ خلنگ نا سوب مریک ہنداخاطرآن دانظام اٹ اصلاحات حکومت نا اولیت ءِ۔ دیوان اٹی سجفوک آ سلاہ تیا ہیت وگپ کرسا وزیراعظم تھنک ٹینک نا کوشست آتا ستاءِ کرسا پارت کرے کہ حکومتی اولیت آتے مون آ تخسا ہر قابل عمل سلاہ نا بابت روڈ میپ اس جوڑ کننگے تانکہ مرحلہ وار اوفتیا عملدرآمد کننگ مرے۔
