پاکستان ہنگری تون خوشگوار تعلقداری تے بھاز اہمیت ایتک، پاکستان پارلیمانی و اقتصادی رابطہ غاتے مون آ درسا ہڑتوم آ کنڈآتا تعلقداری تے پین ودفنگ نا خواہندار ءِ، اسد قیصر
اسلام آباد۔ 21 ستمبر (اے پی پی) اسپیکر قومی اسمبلی اسد قیصر پارینے کہ پاکستان ہنگری تون تینا خوشگوار تعلقداری تے بھاز اہمیت ایتک۔ پاکستان پارلیمانی و اقتصادی رابطہ غاتے مون آ درسا ہڑتوم آ کنڈآتا تعلقداری تے پین ودفنگ نا خواہندار ءِ۔ اوداہیت ءِ ہنگری نا قائم مقام ناظم الامور تیوادارتکاکاس تون گپ وتران کرسا پارے ہرا دوشنبے نادے آ پارلیمنٹ ہاؤس اٹ اسپیکر قومی اسمبلی اسد قیصر تون اوڑدہی کرے ہراٹی ہڑتوم آ کنڈآتا تعلقداری، اہم جہانی و علاقائی امور و تین پہ تینی است خواہی نا ایلو باندات آتیا گپ وتران کننگا داوخت آ اسپیکر اسد قیصر تیوادارتکاکاس تون گپ وتران کرسا پارے کہ ہڑتوم آ ملک آتیٹی پارلیمانی ڈل آتا ہن و بر آن ہڑتوم آ ملک آتا پارلیمنٹ نا باسک آتے اسہ ایلو نا آزموندہ غاتیان فائدہ ہرفنگ و اسہ ایلو ءِ پہہ مننگ نا وارخواہی فراوان مریک۔ اسد قیصر پارے کہ ہڑتوم آ ملک آتیٹی پارلیمانی رابطہ غاتے ٹی ودکی کن پاک ہنگری فرینڈ شپ پڑک اس ٹہیفنگانے۔ پاکستان اٹ کشت وکشار، توانائی، سیل و سوات و انفراسٹرکچر نا بشخ اٹ زرکاری نا بھلو وارخواہی اس ساڑی ءِ ہرافتیان ہنگری نا زرکارآک فائدہ ہرفنگ کیرہ۔ پاکستانی طالب علم آتے ہنگری ٹی تعلیم دوئی کننگ کن تروک آ اسکالر شپ انا کچ اٹ ودکی کننگے۔ ہنگری نا قائم مقام ناظم الامور پارے کہ ہنگری پاکستان تون تینا دوستانہ تعلقداری تے قدر انا نظر اٹ ہرک و اوفتے پین سوگو کننگ نا خواہندار ءِ۔ ڈیہہ ٹی امن کن پاکستان نا کوشست آک ستاکڑزرہ۔ ہڑتوم آ ملک آتا پارلیمنٹ نا باسک آک ہڑتوم آ کنڈآتا تعلقداری تے ودفنگ اٹ اہم کڑد ادا کننگ کیرہ، تیوادارتکاتکاس پارے کہ ہنگری نا زرکارآک پاکستان اٹ زرکاری ٹی بھاز است خواہی تخرہ۔ توانائی، تعلیم و صنعت نا بشخ آتیٹی پاکستان تون کمکاری ءِ برجاتخنہ۔
